Pak orë pas ndryshimeve të miratuara sot (21 mars) në Asamblenë Kombëtare të Partisë Socialiste që u mbajt në Durrës, kryeministri Edi Rama ka bërë lëvizjen e radhës.
Ai ka thirrur në një mbledhje nesër më 22 mars në selinë e PS-së, të gjithë drejtuesit politikë në qarqe, përfshi edhe ata 6 që ndryshoi në mbledhjen e sotme.
Burime bëjnë me dije se takimi do të zhvillohet ditën e nesërme në selinë e PS, duke nisur nga ora 10:00.
Në fokus të mbledhjes pritet të jetë analiza e procesit zgjedhor brenda strukturave të partisë, si dhe organizimi i mëtejshëm në nivel lokal pas riorganizimeve të fundit.
Në ndryshimet e kryera, ra në sy zgjedhja e dy ministrave të rinj si krerë politikë, respektivisht Ermal Nufit të Mbrojtjes në qarkun e Lezhës, duke zhvendosur ish-ministrin Ulsi Manja drejt Dibrës dhe Enea Karakaçit të Infrastrukturës në qarkun Shkodër, duke zëvendësuar kryebashkiakun Benet Beci.
Kurse Belinda Balluku, Zv/kryeministrja e shkarkuar, pezulluar dhe e pandehur nga SPAK-GJKKO, pasi iu mbrojt imuniteti me 82 votat e mazhorancës në Parlament, është shpërblyer përsëri si drejtuese politike në qarkun Fier.
Eduart Shalsi u largua si drejtues i qarkut Kukës, kurse Blendi Klosi u zhvendos nga Dibra në Durrës. Në Tiranë drejtimin politik e mori Taulant Balla.
DREJTUESIT NË QARQE:
Tiranë- Taulant Balla
Durrës-Blendi Klosi
Shkodër- Enea Karakaçi
Lezhë- Ermal Nufi
Kukës- Erion Malaj
Dibër- Ulsi Manja
Elbasan- Arbian Mazniku
Fier- Belinda Balluku
Korçë- Niko Peleshi
Gjirokastër- Mirela Kumbaro
Berat- Ervin Demo
Vlorë- Bledi Çuçi
© Panorama.al
