Për shkak të inerteve dhe dherave në aksin Qafë Plloçë–Qukës, aktualisht është ndërprerë qarkullimi në këtë segment. Sipas informacioneve më të fundit, për të marrë masa lidhur me sigurinë e qarkullimit dhe për të shmangur rreziqet, si në rastin e mjetit të aksidentuar paraditen e sotme, qarkullimi në këtë aks është mbyllur përkohësisht.
Policia Rrugore e Korçës dhe ajo e Elbasanit po orientojnë mjetet drejt rrugës së vjetër, duke vendosur patrulla në hyrje të Qafë Plloçës dhe në hyrje të Qukësit, për të mos lejuar hyrjen në aksin e ri.
Aksi do të qëndrojë i mbyllur deri në momentin që firma kontraktore të pastrojë plotësisht të gjitha dherat dhe inertet që kanë rënë në rrugë dhe derisa të mos ketë më rrezik për qarkullimin e mjeteve. Firma kontraktore ndodhet edhe në këto momente në aks, ku po kryen ndërhyrjet, ndërsa ende nuk dihet se sa do të zgjasë bllokimi i qarkullimit në këtë zonë.
© Panorama.al
