TIRANË- Kreu i LSI-së, Ilir Meta ka uruar gjithë shqiptarët për ditën e rëndësishme të Çlirimit të vendit, duke shprehur nderim per luftën e shqiptarëve për liri dhe familjet e dëshmorëve të rënë.
Pas homazheve në Varrezat e Dëshmorëve, Meta ka theksuar se ishte pikërisht 29 nëntori që e bëri të paprekshme pavarësinë.
Sipas tij, dita e çlirimit është 29 nëntor 1944. “Mirënjohje për dëshmorët dhe heronjtë e luftës. Urojmë familjet e dëshmorëve dhe partizanëve. Kjo është festë e gjithë popullit”- tha meta, duke shtuar se përtej gjithë polemikave për këtë ditë, kujtimi i të rënëve do jetë i pavdekshëm. “Datën e atyre që luftuan nuk e vendos politika, ndaj mbi historinë nuk duhet të ngarkohen emocione politike”- tha ai.
Meta ka ftuar të gjithë të jenë realiste, duke pohuar se historia nuk i toleron emocionet dhe as nuk mund të bëhet një herë në 4 vjet.
“Ne nuk kemi komplekse të vlerësojmë. Ne vlerësojmë komunistët shqiptarë pasi janë ata të cilët kanë mbajtur peshën kryesore në luftën për çlirimin e atdheut. Ne duhet të jemi realist dhe historia nuk bëhet përditë apo çdo katër vjet” ka theksuar më tej Meta.
© Panorama.al
