Kreu i Komunitetit Mysliman Shqiptar, Haxhi Bujar Spahiu, ka bërë një postim në rrjetin e tij social Facebook, përmes të cilit i uron shërim të shpejtë dhe të plotë kryepeshkopit të Shqipërisë Anastas Janullatos, i cili është në gjendje jo të mirë shëndetësore.
Krahas fotos me Janullatos, Spahiu, shprehet se me Janullatosin ka vite që bashkëpunon dhe të dy ndër vite kanë bashkërenduar veprimtarinë e dialogut ndërfetar në Shqipëri.
Ai e karakterizoi atë si “lider të kujdesshëm për besimtarët që përfaqëson”.
Në fund të postimit kreu i KMSH shkruan: “I lutemi Zotit për shërimin e tij të shpejtë e të plotë!”
Postimi i plotë
“Kryepeshkopi i Kishës Ortodokse Autoqefale të Shqipërisë, z. Anastas Janullatos, ndodhet prej disa ditësh në gjendje jo të mirë shëndetësore.
Me Janullatosin kemi vite që bashkëpunojmë dhe bashkërendojmë veprimtarinë e dialogut ndërfetar në Shqipëri. Lider i kujdesshëm për besimtarët që përfaqëson dhe bashkëpunues e tolerant me këdo.
I lutemi Zotit për shërimin e tij të shpejtë e të plotë!”
Kujtojmë se Anastas Janullatos ndodhet i shtruar në spitalin “Evangelismos” në Athinë që prej 3 janarit për shkak të gjendjes jo të mirë shëndetësore.
Kryeopeshkopi ndodhet aktualisht në spital dhe sipas informacioneve më të fundit ai iu nënshtrua sot një operacioni kirurgjikal, pasi gjendja e tij shëndetësore u përkeqësua.
© Panorama.al
