Një 48-vjeçar i shpallur në kërkim për prodhim dhe shitje droge është arrestuar sot (18 mars) gjatë një operacioni në Shkodër.
Policia vendore bëri me dije se vuri në pranga gjatë aksionit ë koduar “Buna”, E.H., banues në Shkodër, i cili ishte i dënuar në mungesë me 4 vjet e 8 muaj burgim.
“I ndaluari, pjesëtar i një grupi kriminal që ka shitur lëndë narkotike, u kap gjatë kontrolleve dhe informacioneve në rrugë operative”, thanë burime zyrtare.
Pas prangosjes, veprimet i kaluan Prokurorisë së Shkodrës, për procedura të mëtejshme.
Njoftimi i Policisë Shkodër:
“Në vijim të kontrolleve të kryera bazuar në informacionet e siguruara në rrugë operative, për lokalizimin dhe kapjen e shtetasve të shpallur në kërkim, specialistët e Seksionit për Hetimin e Narkotikëve, në bashkëpunim me shërbimet e Komisariatit të Policisë Shkodër, kanë organizuar dhe finalizuar operacionin policor të koduar “Wanted 2”, si rezultat i të cilit u kap dhe u vu në pranga shtetasi në kërkim:
-E. H., 48 vjeç, banues në Shkodër.
Gjykata e Shkallës së Parë e Juridiksionit të Përgjithshëm Shkodër e ka dënuar këtë shtetas, me 4 vjet e 8 muaj burgim, për veprën penale “Prodhimi dhe shitja e narkotikëve”, kryer në bashkëpunim.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme”.
© Panorama.al
