Kaosi total me rrugët në Shqipëri dhe izolimi i juglindjes prej ditësh, ka sjellë problematika edhe në udhëtimet tregtare të kamionistëve vendas apo të huaj, pasi vendi ynë përdoret edhe si tranzit.
Pas katër ditësh të bllokuar në kufirin e Qafë-Thanës, dhjetëra kamionistë, kryesisht të huaj, do të kthehen mbrapsht, pasi nuk kalojnë dot në segmentin Pogradec-Librazhd, për shkak të shembjeve të rrugës te “Arrat e Gurrës” dhe në Dragostunjë.
Burime pranë pikës së kalimit kufitar kanë thënë se Drejtoria e Përgjithshme e Doganave ka marrë kontakt me autoritetet e Maqedonisë së Veriut, të cilat do të lejojnë kthimin mbrapsht në Qafë Thanë të kamionëve si dhe do t’i pajisin me një dokument që të mundësohet kalimi në pikën e kalimit kufitar të Bllatës, nga ku më pas marrin Rrugën e Arbrit për në destinacion.
Prej 4 ditësh dhjetëra kamionistë ishin bllokuar në Qafë Thanë, por edhe pranë Hotolishtit, si pasojë e shembjes së rrugës në Dragostunjë.
Një ditë më parë ata lëshuan edhe një apel ndaj shtetit shqiptar që to ndihmonte, pasi ndodheshin në situatë të vështirë dhe po u mbaronin ushqimet.
Ata u shprehën se kishin “një javë pa ujë dhe bukë” dhe në situatë kritike.
Policia Kufitare e Korçës njoftoi sot zyrtarisht se për situatën:
“Autoritetet e Maqedonisë së Veriut, kanë njoftuar nëpërmjet Qendrës së Shkëmbimit të Informacionit, se prej orës 10:00, të ditës së sotme, kanë lejuar lëvizjen e mjeteve të tonazhit të rëndë (kamionë) për në Pikën e Kalimit Kufitar Bllatë, në territorin e Maqedonisë së Veriut. Kamionët do të lejohen me të njëjtën tranzit dhe dokumentacion, gjithashtu edhe ato mjete që janë zhdoganuar do të lejohen të kalojnë dhe në rast se kanë të dëmtuar plumbosjen, do të ripajisen me të reja”.
© Panorama.al
