Në një intervistë për Zërin e Amerikës Zëvendës Ndihmës Sekretari i Shtetit për Euroazinë, Tomas Kantrimen, përshëndeti procesin zgjedhor në Shqipëri, megjithë mosmarrëveshjet e fundit mbi numërimin e votave të hedhura në kutitë e gabuara, vendim që, siç tha ai, do ta marrë Kolegji Zgjedhor. Zoti Kantrimen tha se përfundimi i këtyre zgjedhjeve do të përcaktojë edhe perspektivën e Shqipërisë për anëtarësim në Bashkimin Evropian.
Per Kantrimen pjesëmarrja e lartë në zgjedhjet vendore në Shqipëri, tregon interesin shqipëtarëve për të ardhmen e vendit dhe të demokracisë.
“Dua të përshëndes votuesit në Shqipëri jo vetëm për pjesëmarrjen e lartë, por edhe për një proces paqësor votimi. Kjo, është fitore e madhe për popullin shqiptar”.
Zëvendës Ndihmës Sekretari i Shtetit tha se këto ishin zgjedhjet më të mira që janë zhvilluar ndonjëherë në Shqipëri:
“Mendoj se këto ishin zgjedhjet më të pastërta dhe të drejta që ka parë Shqipëria në historinë e saj. Nuk dua të minimizoj problemet që u shfaqën dhe që vazhdojnë të jenë, por shoh shumë shenja pozitive në mënyrën si u zhvilluan këto zgjedhje.”-pohoi ai.
Kantrimen tha se secila parti mund të nxjerrë mësime nga kjo përvojë.
“Dy partitë e mëdha dolën më mirë në disa zona që e prisnin dhe më keq në disa të tjera. Kjo, më bën të arrij në përfundimin se jeta politike në Shqipëri është e balancuar mes dy forcave të fuqishme. Por në të njëjtën kohë, kjo krijon detyrime për të dy palët për të bashkëpunuar në mënyrë të civilizuar, qoftë përmes debateve publike, parlamentit, apo për zgjedhjet e ardhshme parlamentare. Këtë e presin jo vetëm populli shqiptar, por edhe Shtetet e Bashkuara, Bashkimi Evropian dhe OSBE-ja.”- tha Kantrimen.
Lidhur me çështjen shumë të debatuar të votave të hedhura në kutinë e gabuar, Kantrimen tha se “çështja nuk u trajtua siç duhet. Ne thamë që në fillim që rregullat duhet të jenë të qarta dhe duhen zbatuar në mënyrë të drejtë dhe transparente.”
Rregullat për numërimin e votave të hedhura gabim u bënë pas ditës së zgjedhjeve dhe baza ligjore e këtij vendimi nuk është e qartë për ne, tha ai.
Ai shtoi se megjithëse e kupton argumentin e KQZ-së, mendon se kjo “mund dhe duhej të ishte bërë para zgjedhjeve dhe me konsensus mes partive, pa pasur nevojë të hidhte hije mbi një proces që ishte shumë pozitiv”.
Më tej, në intervistën për Zërin e Amerikës, Kantrimen shprehet se “unë nuk po them që vendimi është i paligjshëm. Unë thjesht po them se baza ligjore nuk është e qartë për ne dhe duket se nuk është në përputhje me praktikat e mëparshme të komisioneve zgjedhore”
Zëvendës Ndihmës Sekretari i Shtetit Kantrimen tha se tani çështja duhet zgjidhur përmes institucioneve kushtetuese. Pra, së pari me apelime në KQZ dhe pastaj në Kolegjin Zgjedhor.
Tani kemi certifikimin e rezultateve të përkohshme nga KQZ-ja që nuk u mor në bazën e një konsensusi, prandaj tani kjo është çështje ligjore që i takon Kolegjit Zgjedhor të vendosë, shtoi ai.
Ne presim, që Kolegji Zgjedhor të marrë një vendim të bazuar në ligj, pa presionin e asnjë prej partive. Ky është detyrim ligjor, tha ai.
Ne presim, vazhdoi me tej ai, që palët të respektojnë vendimin e Kolegjit Zgjedhor dhe të tregojnë më shumë bashkëpunim në të gjitha nivelet e pushtetit. Kantrimen shtoi se perspektiva e integrimit evropian të Shqipërisë do të varet nga mënyra e zgjidhjes së këtij procesi zgjedhor. Ky proces tha ai, duhet zgjidhur përmes mekanizmave ligjore, me dinjitet dhe jo me dhunë.
© Panorama.al
