Kanadaja ka nisur programin e tij shumë miliardë dollarësh që synon të forcojë ushtrinë, duke u mbështetur më tej te kompanitë kombëtare për të ulur varësinë nga Shtetet e Bashkuara.
“Kemi mbështetur tepër te gjeografia jonë dhe te të tjerët për t’u mbrojtur”, deklaroi kryeministri kanadez Mark Carney gjatë një vizite në zyrat e CAE Inc., një kompani e specializuar në teknologjitë e simulimit për sektorët e mbrojtjes dhe aviacionit.
“Kjo ka krijuar cenueshmëri që nuk mund t’i lejojmë më dhe varësi që nuk janë më të qëndrueshme”, shtoi ai.
Kjo strategji industriale e mbrojtjes kanadeze është pjesë e vullnetit të vendit për të investuar 82 miliardë dollarë në mbrojtje gjatë pesë viteve të ardhshme, në mënyrë që Kanadaja të përputhet me objektivat e NATO-s për shpenzimet e mbrojtjes në nivelin 2% të PBB-së deri në fund të vitit dhe 5% deri në vitin 2035.
Carney ka përsëritur prej muajsh se bota po bëhet gjithnjë e më e rrezikshme dhe se SHBA-të nuk janë më një partner i besueshëm, tek i cili Kanadaja mund të mbështetet për mbrojtjen e saj, siç thekson agjencia Agence France-Presse.
Plani parashikon forcimin e kapaciteteve të mbrojtjes në tokë, det dhe ajër, theksoi Carney, i cili vlerësoi se “bota ka ndryshuar dhe Kanadaja duhet të ndryshojë bashkë me të”.
Kryeministri kanadez shprehu veçanërisht shqetësim për sovranitetin e vendit në Arktik, pasi rritja e temperaturave për shkak të ndryshimeve klimatike po çon në shkrirjen e akujve dhe po zgjon interesin e fuqive të mëdha për këtë rajon të pasur me minerale kritike.
Carney është shndërruar në një nga zërat më autoritarë në nivel global që kritikojnë administratën e presidentit amerikan Donald Trump, thekson AFP. Në një fjalim të tij në Davos gjatë World Economic Forum në janar, i cili u transmetua gjerësisht, ai deklaroi se rendi global i dekadave të fundit është “copëtuar”.
Dje ai riktheu vizionin e tij për botën, duke shpjeguar se nacionalizmi kanadez është në kundërshtim me qasjen amerikane të administratës Trump, e cila lartëson rrënjët e krishtera të qytetërimit perëndimor.
“Nacionalizmi kanadez është një nacionalizëm politik dhe mandati i Otavës është të mbrojë të drejtat e çdo individi në një vend të madh dhe të larmishëm”, theksoi Mark Carney.
“Ekziston një përplasje mes nacionalizmit kanadez dhe atij që mbështetet nga SHBA-të”, përfundoi ai.
© Panorama.al
