Kreu i Partisë Demokratike, Sali Berisha, ka reaguar pas ngjarjes së rëndë të ndodhur dje (11 nëntor) pranë aeroportit të Rinasit, ku u ekzekutua Gilmando Dani, i njohur si një prej personazheve të afërt me grupin e Emiljano Shullazit, ndërsa mbeti i plagosur rëndë Muçi Shaljani Sheqeri.
Berisha e cilësoi atentatin si “një ngjarje që u patronua nga shteti”, duke akuzuar qeverinë dhe strukturat e sigurisë për lidhje me grupe kriminale rivale.
“Ekzekutimi publik i Gilmando Danit dhe plagosja e rëndë e Muçi Shaljanit janë një ngjarje e cila u patronua kryekëput nga shteti, për llogari të bandave më të afërta me qeverinë sesa banda e Shullazit,” deklaroi Berisha.
Berisha argumentoi se vendi ku ndodhi ngjarja është një ndër zonat më të sigurta dhe më të mbikëqyrura në vend, ku janë të pranishme njëkohësisht patrulla të Policisë së Rendit, Policisë Rrugore, si dhe njësi të FNSH-së, të dislokuara aty pas ngjarjes së njohur të grabitjes në Rinas.
“Nuk ekziston asnjë zonë tjetër në vend ku të jenë të përqendruara kaq shumë forca policore. Ajo është vetëm 100 metra nga rajoni i Policisë së Rinasit dhe pak metra nga dalja e sallonit VIP,” tha Berisha.
Pjese nga deklarata
Ekzekutimi publik i djeshëm i Gilmando Danit, eksponent kryesor i organizatës kriminale të Emiljano Shullazit, dhe plagosja e rëndë e Muçi Shaljanit apo Sheqerit, në pamje të parë shofer i drejtorit të shërbimeve inteligjente të Policisë së Shtetit dhe inspektor policie, por në fakt një bos, edhe ky bashkë me vëllanë e vet i krimit të organizuar dhe drogës, është një ngjarje e cila u patronua kryekëput nga shteti për llogari të bandave më të afërta me qeverinë se sa banda e Shullazit.
Vendi i ekzekutimit publik të tyre, në protokollet e sigurisë publike është vendi më i ruajtur se çdo vend tjetër.
Në atë zonë, përveç patrullës së policisë së rendit, është patrulla e policisë rrugore dhe po aty ngjitur është furgoni i FNSH-së, i instaluar aty që pas vjedhjes së shekullit të parave në aeroportin e Rinasit.
Është edhe një njësi, e cila rri aty në mbrojtje të sallonit të VIP-ave, kur kalojnë qeveritarët.
Pra, nuk ekziston asnjë zonë tjetër, asnjë territor tjetër në të cilin të kryqëzohen në mbikëqyrje kaq shumë forca policore dhe speciale.
Është gjithsej 100 metër nga rajoni i policisë së Rinasit, është pak metra nga dalja e sallonit të VIP-ave.
Pra, atentatorët apo vrasësit, pasi shkrehën breshëri të shumta mbi makinën që e prisnin të sigurtë, dhe i kishin zënë pritë pikërisht aty që nuk mund të zije pritë kurrë pa lejen e shtetit, pas ekzekutimit u larguan të qetë dhe përshkruan pa asnjë lloj telashi apo andralle të gjithë rrugën Rinas-Fushë Krujë, të gjithë rrugën Fushë Krujë pothuaj Krujë. Fshati Halil është pranë Krujës, ngjitur me kalanë e Zgërdheshit. Dhe ata shkuan në Zgërdhesh dhe asnjë lloj përpjekje nuk u bë nga narkopolicia për të ndaluar vrasësit e Gilmando Danit dhe ata që plagosën rëndë Mustafa Shaljanin apo Sheqerin.
© Panorama.al
