Autoritetet qipriotë njoftuan se kanë arrestuar një anëtar të dyshuar të organizatës terroriste palestineze Hamas, i cili kërkohet në Gjermani për furnizimin me armë dhe municione për sulme ndaj objekteve izraelite ose hebraike, njoftuan të martën prokurorët federalë gjermanë.
I dyshuari me origjinë libaneze, i identifikuar vetëm si Kamel M., në përputhje me rregullat gjermane të konfidencialitetit, u arrestua në aeroportin e Larnakës më 6 mars, pas mbërritjes së tij nga Libani, shtuan ata në një deklaratë.
I dyshuari kërkohet në lidhje me transportin e 300 plumbave, sipas prokurorëve. Nga njoftimi nuk ishte e qartë se nga vinin plumbat, ose ku besohet se po shkonin.
“Operacioni shërbeu si përgatitje për sulme vdekjeprurëse të Hamasit ndaj institucioneve izraelite ose hebraike në Gjermani dhe Evropë”, theksuan ata.
Policia kontrolloi gjithashtu apartamentin e të dyshuarit në Berlin.
Pasi Kamel M. të ekstradohet në Gjermani, një gjyqtar do të vendosë për paraburgimin e tij, thuhet në deklaratë.
Sulmet kundër hebrenjve dhe objektivave hebraike janë rritur në të gjithë botën që nga lufta e Izraelit kundër Hamasit në Gaza, e cila u nxit nga sulmet e organizatës ndaj Izraelit në vitin 2023, raporton “Reuters”.
© Panorama.al
