Brooklyn Beckham, djali i Victoria dhe David Beckham, është gjendur sërish në qendër të vëmendjes së mediave botërore, pasi mori pjesë në një fushatë reklamuese për Kupën e Botës 2026.
Videoja e shkurtër promovuese shkaktoi reagime të shumta në rrjetet sociale, pasi shumë shikues arritën në përfundimin se Brooklyn po aludonte në mënyrë indirekte në marrëdhëniet e tendosura brenda familjes Beckham.
“Ndoshta po pyesni veten pse po e shikoj Kupën e Botës 2026 nga shtëpia. Është një histori e gjatë”, thotë ai në reklamë, duke hedhur disa bileta për turneun mbi tavolinë.
Reklama përfundon me mesazhin: “Është e komplikuar. Do të ketë më shumë së shpejti.”
Vëmendje shtesë tërhoqi edhe përshkrimi që ai publikoi së bashku me videon promovuese në rrjetet sociale, duke lënë një mesazh të shkurtër që nxiti më tej spekulimet publike. “Histori e gjatë”, ka shkruar ai.
Reklama vjen ndërsa media ka raportuar prej muajsh për një përçarje të supozuar midis Brooklyn dhe prindërve të tij, David Beckham dhe Victoria Beckham.
Më herët këtë vit, Brooklyn konfirmoi publikisht se marrëdhënia ishte seriozisht e tendosur dhe bëri një sërë akuzash kundër familjes, duke përfshirë pretendimet se prindërit e tij ndërhynë në jetën e tij private dhe martesën me Nicola Peltz.
© Panorama.al
