Britania e Madhe do të investojë 200 milionë paund (rreth 230 milionë euro) për të përgatitur forcat e saj të armatosura për një mundësi të ardhshme shpërndarjeje në Ukrainë si pjesë e një force shumëkombëshe, nëse Kievi pranon një armëpushim me Rusinë, njoftoi të premten Ministria britanike e Mbrojtjes.
Këto fonde, të marra nga buxheti mbrojtës i vitit 2026, do të mundësojnë “blerjen e mjeteve të reja, sistemeve të komunikimit dhe kapaciteteve mbrojtëse kundër dronëve, duke garantuar kështu që forcat britanike do të jenë të gatshme për shpërndarje”, saktësoi ministria.
Po ashtu, prodhimi i dronëve kundër dronëve Octopus do të nisë këtë muaj në Britani, “me qëllim forcimin e mbrojtjes ajrore të Ukrainës”, njoftoi Ministria e Mbrojtjes.
Ministri britanik i Mbrojtjes, John Healey, ndodhej të premten në Kiev, ku pritet të takohet me presidentin ukrainas Volodymyr Zelensky.
Ky njoftim lidhet me deklaratën e përbashkët të qëllimeve që Britania dhe Franca nënshkruan të martën, duke shprehur gatishmërinë për të dërguar ushtarë për ruajtjen e paqes në Ukrainë në rast armëpushimi.
Kryeministri britanik Keir Starmer premtoi se do të sqarojë “sa më shpejt të jetë e mundur” përmbajtjen e kësaj deklarate dhe garantoi se parlamenti do të vendosë për çdo mision të mundshëm ushtarak në Ukrainë.
Ky plan refuzohet kategorikisht nga Rusia. Të enjten, zëdhënësja e Ministrisë ruse të Jashtme, Maria Zakharova, paralajmëroi se çdo prani e forcave ushtarake perëndimore në Ukrainë do të konsiderohet nga Moska një “objektiv i ligjshëm”.
Ndërkohë, qeveria e Partisë Laburiste nën drejtimin e Starmer ka ripërsëritur synimin për të mbajtur investimet në mbrojtje, pas raportimeve për një mungesë prej 28 miliardë paundësh (32 miliardë euro) në buxhetin mbrojtës.
Një zëdhënës i kryeministrit britanik deklaroi se qeveria e kupton se “kërkesat në fushën e mbrojtjes po rriten për shkak të përshkallëzimit të agresivitetit rus”.
Ai gjithashtu nënvizoi se qeveria ka parashikuar “rritjen më të madhe të shpenzimeve mbrojtëse që nga Lufta e Ftohtë, me një total prej 270 miliardë paundësh (311 miliardë euro) për këtë legjislaturë”.
Britania ka premtuar të rrisë shpenzimet mbrojtëse në 3.5% të PBB-së deri në vitin 2035, sipas objektivit të vendosur nga NATO.
© Panorama.al
