Kryetari i Partisë MUNDËSIA, Agron Shehaj, iu përgjigj deklaratave të kryeministrit Edi Rama, i cili akuzoi MUNDËSINË për shpifje, duke thënë se koha kur Shqipëria shihej si një mundësi për të përfituar nga Rama dhe oligarkët po merr fund.
“E dini pse e kemi vendosur emrin MUNDËSIA? Sepse çdo i ri që takonim na thoshte: ‘Në Shqipëri nuk ka asnjë mundësi’”, u shpreh ai.
Sipas Shehajt, sot gjithnjë e më shumë shqiptarë po i hedhin sytë nga MUNDËSIA, sepse kërkojnë një Shqipëri ku mund të jetojnë dhe punojnë ndershëm.
“Shyqyr që erdhi dita që shqiptarët i hedhin sytë nga MUNDËSIA. Ka mbaruar koha kur ti dhe miqtë e tu, oligarkët e tu, e shikonit Shqipërinë si një mundësi për të vjedhur. Tani ka ardhur koha që shqiptarët të besojnë se ekziston një mundësi edhe për ta; që Shqipëria mund të jetë një mundësi për çdo shqiptar që do të jetojë ndershëm në vendin e tij”, deklaroi Shehaj.
Kreu i MUNDËSISË hodhi poshtë akuzat e Ramës për shpifje, duke iu referuar çështjeve penale që lidhen me ish-kryebashkiakun Erion Veliaj, zëvendëskryeministren Belinda Balluku dhe ish-ministrin e Shëndetësisë Ilir Beqaj.
“Ku janë shpifjet? Çfarë është shpifje? Që Erion Veliaj është në burg, i akuzuar për korrupsion, është shpifje? Që Belinda Balluku, krahu yt i djathtë, është e akuzuar për korrupsion, është shpifje? Që Ilir Beqaj, ministri yt i Shëndetësisë, akuzohet se ka vjedhur fondet që duhet të shkonin për ilaçe, është shpifje? Jo, nuk është shpifje, janë fakte!”, tha Shehaj.
Në fund, Shehaj iu drejtua drejtpërdrejt kryeministrit:
“Mbaroi koha jote dhe mos bëj viktimën. Të ka mbetur vetëm një mundësi edhe ty: të ikësh, sa më shpejt.”
© Panorama.al
