Ndeshjet vendimtare të fazës së grupeve në Kupën e Botës 2026 nuk do të ndërpriten nëse sfida tjetër e grupit përballet me vonesa për shkak të motit, një vendim që ka ngritur frikën për një përsëritje të skandalit të famshëm të njohur si “Turpi i Gijónit”. Nga kjo mbrëmje, ndeshjet e fundit të grupeve do të luhen në të njëjtën orë për të përcaktuar skuadrat që do të avancojnë në fazën e 1/32-ve.
Ky sistem është vendosur prej vitesh për të garantuar integritetin e garës dhe për të shmangur kalkulimet mes ekipeve. Megjithatë, kushtet atmosferike të paqëndrueshme të verës në Amerikën e Veriut kanë shkaktuar tashmë ndërprerje në disa ndeshje të turneut. Sipas Daily Mail Sport, në rast se njëra nga dy ndeshjet e fundit të grupit ndërpritet për shkak të motit, sfida tjetër nuk do të ndalet për të ruajtur sinkronizimin.
Kjo do të thotë se një ndeshje mund të përfundojë ndërsa tjetra vazhdon ende, duke krijuar një avantazh të mundshëm për skuadrat që luajnë në takimin e vonuar. Në një situatë të tillë, dy ekipet që janë ende në fushë mund të dinë saktësisht se çfarë rezultati u nevojitet për t’u kualifikuar, pasi do të kenë informacion të plotë nga ndeshja tjetër që ka përfunduar më herët.
Ky skenar ka rikthyer kujtimet e “Turpit të Gijónit”, një nga episodet më të errëta në historinë e Kupës së Botës. Në Botërorin e vitit 1982, Gjermania Perëndimore mposhti Austrinë me rezultatin 1-0 në një ndeshje ku të dyja skuadrat e dinin se ky rezultat i kualifikonte së bashku në fazën tjetër. Pas golit të hershëm të gjermanëve, loja u shndërrua në një farsë, me të dy ekipet që nuk bënë përpjekje serioze për të ndryshuar rezultatin.
Edhe pse FIFA vendosi se nuk ishte shkelur asnjë rregull, reagimi i opinionit publik ishte aq i madh sa organizata ndryshoi rregulloren dhe vendosi që ndeshjet e fundit të grupeve të zhvilloheshin njëkohësisht.FIFA ka bërë të ditur gjithashtu se nuk do të vendosë kufizime kohore për ndeshjet e ndërprera nga moti dhe se ato do të luhen deri në përfundim, pavarësisht kohëzgjatjes së vonesës.
Rasti i parë ndodhi të hënën në ndeshjen mes Francës dhe Irakut, e cila u ndërpre në pushimin mes pjesëve për shkak të stuhive, kur francezët kryesonin 1-0. Takimi u rifillua pas një vonese prej dy orësh dhe përfundoi me fitoren 3-0 të Francës. Ndeshja që nisi në orën 17:00 sipas kohës lokale u mbyll vetëm në orën 20:47. Tani mbetet për t’u parë nëse kushtet atmosferike do të ndikojnë në ndeshjet vendimtare të grupeve dhe nëse FIFA do të përballet me polemika të reja për një rregull që mund të hapë derën për kalkulime të rrezikshme në garën për kualifikim.
PANORAMASPORT.AL
© Panorama.al
