Marius Borg Høiby, djali i madh i princeshës trashëgimtare të Norvegjisë, Mette-Marit, ka apeluar vendimin e gjykatës që e dënoi me katër vite burg për dhunë seksuale.
Lajmi është konfirmuar nga avokati i tij, Petar Sekulic, i cili deklaroi se klienti i tij i konsideron akuzat të pabazuara dhe dënimin të gabuar.
“Ai deklarohet i pafajshëm për këto akuza dhe mendon se burgosja e tij është një gabim”, tha Sekulic për gazetën norvegjeze VG. “Meqenëse vazhdon të këmbëngulë në pafajësinë e tij, ai ka paraqitur apelim”, shtoi avokati.
Më 15 qershor, Gjykata e Qarkut të Oslos e dënoi 29-vjeçarin me katër vite burg. Høiby ishte përballur me gjithsej 32 akuza penale, mes tyre katër raste të dhunës seksuale. Gjykata e shpalli të pafajshëm në dy prej këtyre rasteve.
Për veprat penale për të cilat akuzohej, dënimi maksimal i parashikuar nga ligji arrinte deri në 10 vite burg.
Prokuroria kishte kërkuar fillimisht një dënim prej shtatë vitesh e shtatë muajsh burg, ndërsa mbrojtja kishte kërkuar uljen e dënimit në një vit e gjysmë.
Høiby ka mohuar të gjitha akuzat për dhunë seksuale, por ka pranuar përgjegjësinë për disa vepra më të lehta penale.
Megjithëse është djali i princeshës trashëgimtare Mette-Marit, ai nuk mban titull mbretëror dhe nuk ushtron asnjë funksion zyrtar në Familjen Mbretërore të Norvegjisë.
© Panorama.al
