Aktori i njohur hollivudian George Clooney, është në zi pasi u trondit nga humbja e njeriut të dashur të familjes.
Ai është në zi të thellë pasi motra e tij e madhe, Adelia “Ada” Seidler, ndërroi jetë të premten, më 19 dhjetor, në moshën 65 vjeçe, pas një beteje me kancerin, sipas revistës People.
Publikimi raporton se ajo ndërroi jetë në paqe, e rrethuar nga të dashurit e saj, në Qendrën Shëndetësore St. Elizabeth në Edgewood, Kentucky.
Në një deklaratë, George Clooney tha:
“Motra ime, Ada, ishte heroina ime. Ajo u përball me kancerin me guxim dhe humor. Nuk kam takuar kurrë një person kaq të guximshëm. Mua dhe Amal do të na mungojë shumë”.
Ada Seidler lindi më 2 maj 1960 në Los Angeles. Ajo ishte vajza e gazetarit dhe prezantuesit televiziv Nick Clooney dhe autores Nina Bruce Warren. Ajo ishte një artiste e talentuar dhe punoi për shumë vite si mësuese arti në një shkollë fillore në Augusta, Kentucky.
Gjatë viteve të studimeve, ajo u dallua për performancën e saj akademike, gjë që i siguroi një bursë studimi. Në të njëjtën kohë, ajo mori pjesë aktive në një klub leximi, ishte anëtare e Augusta Art Guild.
Më pas studioi në kolegje në Louisville dhe Kentucky Veriore dhe punoi gjithashtu si kontabiliste. Në vitin 1987, ajo u martua me Norman Seidler, një kapiten në pension në Ushtrinë Amerikane, i cili vdiq në vitin 2004 nga një atak në zemër. Në dasmën e tyre, Clooney kishte lexuar një fragment nga Bibla, ndërsa halla e tyre, këngëtarja e famshme Rosemary Clooney, kishte kënduar për çiftin.
Edhe pse mbajti një profil të ulët dhe shmangu paraqitjet publike, Ada Seidler mori pjesë në dasmën e vëllait të saj me Amal Clooney në Venecia në vitin 2014.
© Panorama.al
