Pesë persona janë vënë në pranga për vjedhjen e dy bulldogëve francezë të artistes amerikane Lady Gaga.
Ngjarja ndodhi në muajin shkurt teksa qentë ishin nxjerrë shëtitje nga kujdestari i tyre, Ryan Fischer.
Grabitësit qëlluan me armë në gjoks Fischer dhe morën qentë e Lady Gaga, Koji dhe Gustav.
Kujdestari i qenve iu nënshtrua një operacioni dhe iu desh të hiqte një pjesë të mushkërive, por i mbijetoi plagës së marrë.
Të enjten, policia e Los Angeles njoftoi se kishte arrestuar 5 persona si të dyshuar për grabitjen e qenve.
James Jackson, Jaylin White dhe Lafayette Whaley – përkatësisht të moshës 18, 19 dhe 27-vjeç, janë akuzuar për tentativë vrasjeje dhe grabitje.
Ndërsa 40-vjeçari Harold White, babai i Jaylin White, si edhe Jennifer McBride, 50 vjeç, u akuzuan si bashkëpunëtore.
McBride i ktheu qentë në polici dy ditë pas grabitjes, pasi Lady Gaga ofroi një shpërblim prej 500.000 dollarë për kthimin e tyre.
Policia tha se grabitësit nuk e dinin që Fischer punonte për këngëtaren kur e sulmuan.
Ata vetëm dinin që qentë kushtonin shumë për tu shitur dhe ky ishte motivi që i grabitën.
Fischer po ecte me tre qentë në një zonë rezidenciale të Hollywood gjatë darkës kur sulmuesit iu afruan me makinë.
Ata e qëlluan me pistoletë në gjoks dhe arritën të merrnin vetëm dy prej qenve. Ndërsa një prej bulldogëve të Lady Gagas, Azia, doli e padëmtuar nga incidenti.