Instagram gjobitet me 405 milionë euro, ja arsyeja

Rregullatorët irlandezë kanë gjobitur gjigandin e rrjeteve sociale ‘Instagram’ me 405 milionë euro për shkeljen e privatësisë së fëmijëve.

Në ankesën e gjatë u paraqitën shkleje që kishin të bënin me të dhënat e fëmijëve – veçanërisht numrat e tyre të telefonit dhe adresat e emailit.

Kompania mëmë e Instagramit, Meta, tha se kishte në plan të apelonte vendimin. Kjo është gjoba e tretë që i vjen kompanisë nga rregullatori.

“Ne miratuam vendimin tonë përfundimtar të premten e kaluar dhe ai përmban një gjobë prej 405 milion € [349 milion £],” tha Komisioneri i Mbrojtjes së të Dhënave të Irlandës (DPC).

Nga ana tjetër, një zyrtar i Meta tha për BBC News: “Ky hetim u fokusua në cilësimet e vjetra që i përditësuam më shumë se një vit më parë dhe që atëherë kemi lëshuar shumë veçori të reja për të ndihmuar në mbajtjen e adoleshentëve të sigurt dhe informacionin e tyre privat. Çdokush nën 18 vjeç e ka automatikisht llogarinë e tij private kur i bashkohet Instagramit, kështu që vetëm njerëzit që njohin mund të shohin se çfarë postojnë dhe të rriturit nuk mund t’u dërgojnë mesazhe adoleshentëve që nuk i ndjekin. Ndërsa ne jemi angazhuar plotësisht me DPC gjatë gjithë hetimit të tyre, ne nuk jemi dakord me mënyrën se si është llogaritur kjo gjobë dhe synojmë ta apelojmë atë. Ne po vazhdojmë të shqyrtojmë me kujdes pjesën tjetër të vendimit.”

DPC është rregullator i kompanive të mëdha të teknologjisë me seli evropiane në Republikën e Irlandës. Vlen të përmendet se nuk është dhënë asnjëherë një gjobë kaq të madhe për një shkelje të Rregullores së Përgjithshme të Mbrojtjes së të Dhënave të Bashkimit Evropian.

Por vitin e kaluar, ajo gjobiti WhatsApp-in 225 milionë euro , ndërsa autoriteti i të dhënave të Luksemburgut gjobiti Amazon me 746 milionë euro rekord . Kreu i politikave të sigurisë në internet të Shoqatës Kombëtare për Parandalimin e Mizorisë ndaj Fëmijëve (NSPCC), Andy Burrows, tha për gjobën e Instagramit: “Kjo ishte një shkelje e madhe që kishte implikime të rëndësishme mbrojtëse dhe potencial për të shkaktuar dëm të vërtetë tek fëmijët që përdorin Instagram. Vendimi demonstron se si zbatimi efektiv mund të mbrojë fëmijët në mediat sociale dhe nënvizon se si rregullorja tashmë po i bën fëmijët më të sigurt në internet. Tani i takon kryeministrit të ri që të mbajë premtimin për t’u dhënë fëmijëve mbrojtjen më të fortë të mundshme duke dorëzuar plotësisht dhe pa vonesë Projektligjin e Sigurisë në internet.”