Një “super kartel” droge që kontrollonte rreth një të tretën e furnizimit me kokainë në Evropë është çmontuar, ka njoftuar policia.
Operacioni i koduar “Desert Light”, çoi në pranga 49 persona, të cilët u arrestuan në gjashtë vende evropiane, tha agjencia policore e BE-së, Europol. Mes tyre ishte një shtetas britanik, i cili dyshohet se drejtonte operacionin.
Mbi 30 ton (30,000 kg) drogë u kapën gjatë hetimit dyvjeçar, tha Europol. Në operacionin “Desert Light”, u përfshinë autoritetet në Spanjë, Belgjikë, Holandë dhe Emiratet e Bashkuara Arabe (EBA), të cilat punuan së bashku për të goditur kartelin e trafikut të kokainës, tha agjencia evropiane, Europol në një deklaratë.
Të arrestuarit përfshinin gjashtë “objektiva me vlerë të lartë”, ata më të kërkuar nga policia ndërkombëtare. Europol tha se organizata kishte formuar një “rrjet kriminal pjellor të përfshirë në trafikun në shkallë të gjerë të drogës dhe pastrimin e parave”.
Agjencia shtoi se shkalla e operacionit të drogës ishte “masive”. Kokaina e importuar nga Amerika e Jugut nëpërmjet Holandës ishte fokusi kryesor i hetimit dhe shumica e arrestimeve u bënë atje në vitin 2021. Të tjerat u bënë në fillim të këtij muaji, midis 8-19 nëntorit, gjatë bastisjeve të koordinuara në gjashtë vendet e tjera, tha Europol.
KREU I KARTELIT NË DUBAI
Operacioni është i fundit në një seri përpjekjesh të policisë për të hakuar telefonat e koduar të përdorur nga rrjetet e krimit të organizuar për trafikimin e drogës dhe pastrimin e parave.
Një video e postuar në faqen e agjencisë në “YouTube” tregoi ekipe hetuesish dhe qensh nuhatës duke kontrolluar shtëpitë e mbushura me makina luksoze, megjithëse është e paqartë nëse ndonjë pasuri u sekuestrua gjatë arrestimeve, shkruan BBC.
Britaniku i dyshuar si kryesues i “super kartelit” ishte arratisur në Dubai pasi më parë shmangu arrestimin në Spanjë, tha në një deklaratë Guardia Civil e vendit. Ai dyshohet se vazhdoi të drejtonte kartelin nga Emiratet e Bashkuara Arabe. Një burim anonim i Europolit i tha agjencisë së lajmeve AFP se një tjetër i dyshuar holandez “peshk i madh”, me lidhje të dyshuara me bosin e krimit holandez të profilit të lartë Ridouan Taghi, u arrestua gjithashtu.
Prokurorët holandezë thanë se do të kërkonin ekstradimin e të dyshuarve nga Emiratet e Bashkuara Arabe, të cilët tani përballen me akuza për trafik droge në shkallë të gjerë dhe pastrim parash. Analistët thonë se të dhënat e dekadës së fundit sugjerojnë se aksesi ndaj kokainës në Evropë po rritet çdo vit.
Veprat penale që lidhen me përdorimin ose posedimin e kokainës janë gjithashtu në rritje, me rreth 3.5 milionë të rritur që kanë konsumuar drogën vitin e kaluar.
Në fillim të këtij muaji, policia në Spanjë kreu një seri bastisjesh që rezultuan në zbulimin e sasisë më të madhe të kanabisit të gjetur ndonjëherë. Marijuana e paketuar e gjetur ishte e barabartë me rreth 1.1 milion bimë.
Si nisi operacioni në Spanjë pas zbulimit të kontejnerit me drogë
Si rezultat i këtij operacioni, në Spanjë janë arrestuar 13 persona, nëntë prej tyre me shtetësi spanjolle. Operacioni “Faukas” nisi me zbulimin e një kontejneri në portin e Valencias në mars të vitit 2020, përmes të cilit organizata synonte të merrte 698 kilogramë kokainë.
Kjo ngjarje shkaktoi një shkëmbim të gjerë informacioni me agjenci të shumta policie nga vende të tjera, gjë që dha fryt kur u identifikuan përgjegjësit për futjen e kontejnerit nga Panamaja.
SI FUNKSIONONTE KARTELI
Europol verifikoi se në Spanjë ishte krijuar një rrjet që futi kontejnerë me kokainë në portet e Barcelonës, Valencias dhe Algeciras (Cádiz) dhe se kishte formuar një rrjet kompleks investimesh në pasuri të paluajtshme në zonën bregdetare, duke pastruar në këtë mënyrë përfitimet që vinin nga trafiku i drogës.
Agjentët identifikuan drejtuesin e këtij rrjeti, një shtetas britanik i lidhur me Costa del Sol, i cili duhej të largohej nga Spanja kur u përpoqën ta rrëmbenin dhe që u zhvendos në Dubai, nga ku vazhdoi të drejtonte veprimtarinë kriminale.
Ai mbante kontakte me pjesën tjetër të “bosëve të drogës” me qendër në Emirate dhe drejtonte biznesin e trafikut të lëndëve narkotike. Po kështu, ata identifikuan furnizuesin e drogës, një shtetas panamez me banim gjithashtu në Dubai, i cili dyshohet se ishte përgjegjës për futjen e kokainës në portin Manzanillo në Panama dhe që mbante kontakte edhe me bosët e tjerë në Emirate.
Rrjeti kishte dy struktura në Spanjë, njëra e ngarkuar për nxjerrjen e drogës nga portet detare tregtare dhe një tjetër për pastrimin e parave nëpërmjet kompanive. Siç theksohet nga Garda Civile në një shënim, me këtë operacion është arritur një moment historik në luftën kundër trafikut botëror të drogës.
Pjesa tjetër do të përbëhej nga njerëz shumë të besuar nga lideri i organizatës kriminale, me vendndodhje në Costa del Sol, qendra nervore e aktiviteteve të tyre financiare, nga ku do të kishin marrë pasuri të luajtshme dhe të paluajtshme dhe aksione me vlerë rreth 24 milionë euro.
Në të dhënat u shfaqën elementë që lidhin të hetuarit me veprimtari kriminale, si dhe më shumë se 500 mijë euro cash, tre armë të shkurtra, municione dhe sende luksoze duke përfshirë automjete të nivelit të lartë, disa prej tyre me çmime afër 300 mijë euro.
NDIQE LIVE "PANORAMA TV" © Panorama.al
