Votuesit në Zvicër kanë hedhur poshtë një propozim të paprecedentë të së djathtës ekstreme për të kufizuar popullsinë e vendit në 10 milionë.
Propozimi, “Jo një Zvicre prej 10 milionësh!”, u hodh poshtë nga shumica e kantoneve dhe nga 54.8% e votuesve në referendum, pas një fushate të nxehtë. Teksti i vënë në votim bënte thirrje për kufizimin e popullsisë me banorë të përhershëm në mënyrë që ajo të mos i kalonte 10 milionë para vitit 2050.
Rreth 54.79% e votuesve ishin kundër propozimit të Partisë Popullore Zvicerane (SVP) dhe 45.21% ishin pro. Pjesëmarrja në votime ishte 58.86%.
Një rezultat i ndryshëm do ta kishte detyruar qeverinë zvicerane të kufizonte popullsinë, aktualisht 9.1 milionë, në 10 milionë deri në vitin 2050, duke miratuar kufizime të ashpra për ribashkimin familjar, lejet e qëndrimit dhe azilin nëse numri do të kishte arritur në 9.5 milionë para asaj date.
Sipas propozimeve, nëse pragu prej 10 milionë njerëzish tejkalohej para vitit 2050, qeveria zvicerane do të ishte e detyruar të tërhiqej nga marrëveshja e lëvizjes së lirë të vendit me BE-në, duke i dhënë fund aksesit të saj në tregun e vetëm të bllokut.
SVP-ja, e cila ka më shumë vende në parlament, për vite me radhë ka nxitur ndjesi anti-emigrante, veçanërisht në lidhje me punëtorët nga vendet fqinje të BE-së.
Popullsia e Zvicrës është rritur shumë më shpejt se ajo e shteteve fqinje të BE-së, duke u rritur me 23% që kur hyri në fuqi marrëveshja për lëvizjen e lirë në vitin 2002.
© Panorama.al
