Autoritetet kanë arrestuar kryegardianin e Burgut të Domokos në Greqi, pasi akuzohet për bashkëpunim në vrasjen e një 43-vjeçari grek të dënuar me burgim të përjetshëm brenda qelive, nga një tjetër i dënuar bullgar, po me izolim përjetë.
Sipas informacioneve, hetuesi nuk u bind nga skenari se bullgari “shpëtoi” rojën e burgut dhe dyshon për një krim të organizuar nga brenda, për motive ende të paqarta. Kryegardiani i arrestuar është njëkohësisht baxhanaku i një shqiptari të dënuar për krime të rënda, i arratisur nga ky burg pasi përfitoi një leje në rrethana të dyshimta, po me ndihmën e rojës së ndaluar.
Sipas mediave greke, ka dyshime edhe për shqiptarin tjetër, Alket Rizai, si mundësisht të përfshirë, pasi ka qenë shumë pranë skenës së krimit të ekzekutimit me 2 plumba të grekut në burg.
Që në fillim, skenari i mbështetur nga drejtori i burgut të Domokos dhe i dënuari bullgar (autori i “kontratës së vdekjes” kundër biznesmenit greko-australian Yannis Makris, i cili u vra jashtë shtëpisë së tij në Vula në tetor 2018), se i burgosuri 43-vjeçar grek u përpoq të qëllonte rojen e burgut, kishte boshllëqe të mëdha. Oficerët që merren me çështjen po bëjnë një sërë pyetjesh që, në thelb, e hedhin poshtë këtë rrëfim.
Së pari, nga analiza e videos që ekziston brenda burgut (jo në vendin e vrasjes) dhe konkretisht nga korridoret, duket se 43-vjeçari grek po del nga qelia e tij , pasi ishte informuar më parë se drejtori i burgut po e kërkonte.
Ai del nga qelia i veshur me pantallona të shkurtra dhe një bluzë, dhe nga lëvizjet e tij nuk duket se ka në zotërim armë, siç pretenduan shefi i rojes dhe krimineli bullgar.
Kur mbërritën në vendngjarje (e cila, krejt rastësisht, është “e verbër” nga kamerat e sigurisë, kështu që kushdo mund të pretendojë çfarë të dojë), sipas asaj që pretendojnë roja e burgut dhe bullgari, 43-vjeçari e sulmoi të parin me qëllim që ta qëllonte.
Pastaj bullgari e çarmatosi, por në vend që ta imobilizonte (duke qenë i paarmatosur dhe ndërsa me të ishte një person tjetër – shefi i rojes), vendosi ta qëllonte, informon “Protothema”.
Në fakt, ai nuk e qëllon një herë dhe këtë diku në trup, por tre herë, me dy plumba që e godasin 43-vjeçarin grek të dënuar me burgim të përjetshëm në kokë.
“Ka indikacione serioze se ky skenar nuk korrespondon me realitetin”, theksojnë me kuptim oficerët e lartë.
Siç raportojnë ata për median greke, si ekzaminimi balistik ashtu edhe raporti mjeko-ligjor do të japin përgjigje për atë që ndodhi të dielën në mbrëmje. Prej andej, do të përcaktohet se cili ishte këndi nga i cili u qëllua viktima dhe kështu do të përshkruhet incidenti.
Si hyri arma në burgje?
Arma, sipas shefit të rojes dhe autorit bullgar, ishte në posedim të viktimës.
Nëse e pranojmë këtë skenar si të mundshëm, kjo do të thotë që 43-vjeçari grek kishte arritur ta merrte armën dhe ta kalonte atë nëpër sistemet e sigurisë – sigurisht pa asnjë dëmtim – pasi supozohet se ai do të kishte nevojë për ndihmë të brendshme.
Kryegardiani, baxhanak i shqiptarit të arratisur
Shefi i rojes, siç u bë e ditur dje, është “baxhanak” me një shqiptar të arratisur nga burgu i Domokos (gratë motra).
Megjithatë, hetimet e mëtejshme zbulojnë se një tjetër i afërm i tij i ngushtë, në vitet 2000, u arrestua në operacionin e madh të Sigurisë për të ashtuquajturën “Sindikatë Krimi”, pasi ai ishte “fyti i thellë” i Mafias Greke.
Oficerët e policisë që kishin trajtuar çështjen në atë kohë raportojnë se ai po i jepte informacione një personi që u vra në Haidari, me shumë që besojnë se ‘cikli i gjakut’ që nuk është mbyllur deri më sot, filloi që atëherë.
© Panorama.al
