Komanda Qendrore e Shteteve të Bashkuara (CENTCOM) ka deklaruar se lundrimi në Ngushticën e Hormuzit vijon normalisht dhe se rruga ujore ndërkombëtare mbetet e hapur për të gjitha anijet që kalojnë në mënyrë të ligjshme.
Në një deklaratë zyrtare, CENTCOM thekson se forcat amerikane janë të vendosura dhe të gatshme të garantojnë lirinë e lundrimit, pavarësisht, siç thuhet, “agresionit, ngacmimeve, kërcënimeve dhe deklaratave arbitrare të pajustifikuara të Iranit”.
Administrata amerikane ka ashpërsuar gjithashtu retorikën ndaj Teheranit, duke e akuzuar për veprime destabilizuese dhe duke theksuar se Irani nuk ka kontroll mbi Ngushticën e Hormuzit.
Deklarata e plotë e CENTCOM:
“Ngushtica e Hormuzit është e hapur për të gjitha anijet që kërkojnë të kalojnë ligjërisht nëpër këtë rrugë ujore ndërkombëtare. Forcat amerikane janë të vendosura dhe të gatshme të sigurojnë që liria e lundrimit të ruhet, pavarësisht agresionit, ngacmimeve, kërcënimeve dhe deklaratave arbitrare të pajustifikuara të Iranit. Irani nuk i kontrollon ngushticat. Trafiku detar po zhvillohet normalisht.”
© Panorama.al
