Ministria e DrejtësisëTIRANE – Drejtoresha e sektorit për shtetësinë dhe refugjatët në Ministrinë e Brendshme, Drita Avdyli, është zgjedhur kryetare e Dhomës Kombëtare të Ndërmjetësve. Zgjedhja e saj në drejtimin e këtij institucioni është bërë në një mbledhje të mbajtur në Ministrinë e Drejtësisë ditën e diel, më datë 7 korrik 2013. Ky dikaster ka publikuar dje një njoftim në lidhje me krijimin e Dhomës Kombëtare të Ndërmjetësve dhe zgjedhjen e organeve drejtuese. Ministria e Drejtësisë ka bërë publike të gjitha dokumentet e mbledhjes, pjesëmarrësit dhe vendimet e marra. Dikasteri i drejtësisë ka pohuar se “Në Republikën e Shqipërisë, sipas Regjistrit të Ndërmjetësve që mbahet sipas ligjit nga Komisioni i Licencimit të Ndërmjetësve, mund të ushtrojnë veprimtarinë e tyre vetëm 27 ndërmjetës persona fizikë dhe 2 ndërmjetës persona juridikë”. Në mbledhjen e datës 7 korrik mësohet se morën pjesë 28 ndërmjetës, nga 29 të regjistruar. Mbledhja e Përgjithshme e Ndërmjetësve fillimisht përzgjodhi personat që do të moderonin mbledhjen e parë të ndërmjetësve dhe më pas vendosi me 24 vota pro të konsiderojë të konstituuar Dhomën Kombëtare të Ndërmjetësve, thuhet në njoftimin e Ministrisë së Drejtësisë. Sipas saj, në vazhdim të mbledhjes së ndërmjetësve u përcaktua rendi i ditës me tri pika: Miratimi i rregullave të përkohshme për zhvillimin e mbledhjes së parë; Miratimi i statutit të Dhomës Kombëtare të Ndërmjetësve; Zgjedhjen e organeve drejtuese të Dhomës Kombëtare të Ndërmjetësve. Pas miratimit të statutit, në mbledhje u vendos të vijohej me procedurën e përzgjedhjes së kryetarit dhe Kryesisë së Dhomës Kombëtare të Ndërmjetësve. Burimet zyrtare thanë se nga procesi i votimit në përbërje të kryesisë u zgjodhën: Drita Avdyli, Zhanina Dapi, Iris Çekani, Loreta Mamani, Rexhina Koçia, Genci Anastasi dhe Ylli Kameri.
