Organizata Hezbollah hodhi poshtë sot, (17 shkurt), vendimin e qeverisë libaneze, për t’i dhënë ushtrisë së vendit një afat katërmujor, për të vazhduar me fazën e dytë të planit të çarmatimit, duke thënë se nuk do të pranojë një veprim që, siç thotë ajo, i shërben Izraelit.
Gushtin e kaluar, Kabineti Libanez i ngarkoi ushtrisë detyrën e hartimit dhe zbatimit të një plani për të vënë armët e të gjitha grupeve të armatosura nën kontrollin e shtetit.
Plani përqendrohej në çarmatosjen e Hezbollahut pas luftës së tij shkatërruese me Izraelin në vitin 2024.
Një muaj më vonë, qeveria pranoi zyrtarisht planin e ushtrisë për të çarmatosur organizatën shiite pro-iraniane, megjithëse nuk caktoi një afat të qartë kohor. Madje paralajmëroi se aftësitë e kufizuara të ushtrisë dhe sulmet e vazhdueshme izraelite mund ta pengonin këtë përpjekje.
Sekretari i Përgjithshëm i Hezbollahut, Naim Qassem, në një fjalim të hënën, tha se “ajo që po bën qeveria libaneze në lidhje me çarmatimin është një gabim i madh, sepse i shërben qëllimeve të agresionit izraelit”.
Ministri libanez i Informacionit, Paul Morkos, në një konferencë për shtyp të hënën vonë në mbrëmje pas një mbledhjeje të kabinetit, njoftoi se qeveria kishte shqyrtuar raportin mujor të ushtrisë mbi planin e kontrollit të armëve dhe i kishte dhënë asaj një afat katërmujor për ta zbatuar atë.
Ai vuri në dukje, megjithatë, se ky afat mund të zgjatet dhe do të varet “nga aftësitë e disponueshme, sulmet izraelite dhe pengesat në terren”.
Deputeti i Hezbollahut, Hassan Fadlallah, tha se “nuk mund të jemi të nënshtruar”, duke sugjeruar se grupi e hedh poshtë afatin kohor dhe qasjen më të gjerë të qeverisë ndaj çarmatimit. Hezbollahu e hedh poshtë çarmatimin për sa kohë që vazhdojnë sulmet izraelite, dhe ministrat shiitë dolën nga një mbledhje e kabinetit në shenjë proteste.
Izraeli, nga ana e tij, thotë se çarmatosja e Hezbollahut është një përparësi sepse armët e tij, jashtë kontrollit të shtetit, përbëjnë një kërcënim të drejtpërdrejtë për sigurinë e tij.
Zyrtarët izraelitë thonë se çdo plan çarmatimi duhet të zbatohet plotësisht dhe në mënyrë efektive, veçanërisht në zonat pranë kufirit, duke vënë në dukje se veprimi i vazhdueshëm ushtarak i Hezbollahut është një shkelje e rezolutave përkatëse ndërkombëtare.
© Panorama.al
