NATO ka nisur vendosjen e një sistemi të ri të mbrojtjes ajrore amerikan ‘Patriot’ në qytetin Adana, në jug të Turqisë, mes shqetësimeve në rritje për kërcënimet me raketa që lidhen me konfliktin me Iranin, raporton Al Jazeera.
Lajmi u konfirmua të mërkurën (18 mars) nga Ministria turke e Mbrojtjes.
Sistemi i ri po vendoset në një zonë strategjike ku ndodhet baza ushtarake Incirlik, e cila përdoret nga forcat e Shteteve të Bashkuara dhe aleatëve të tjerë, përfshirë Katarin, Spanjën dhe Poloninë, përveç ushtrisë turke.
Turqia, që ka ushtrinë e dytë më të madhe në NATO dhe kufizohet me Iranin, kishte njoftuar edhe javën e kaluar vendosjen e një tjetër sistemi Patriot në provincën Malatya, pranë një radari të Aleancës. Kjo lëvizje është pjesë e përpjekjeve për të forcuar mbrojtjen ajrore të vendit.
Në një deklaratë zyrtare, Ministria turke e Mbrojtjes theksoi se, përveç masave kombëtare për sigurinë ajrore dhe mbrojtjen e qytetarëve, një sistem shtesë Patriot po vendoset në Adana. Ky sistem operohet nga Komanda Ajrore Aleate me bazë në Ramstein, Gjermani, dhe do të plotësojë sistemin spanjoll Patriot që ndodhet tashmë në rajon.
Adana konsiderohet një pikë kyçe strategjike, pasi baza Incirlik luan rol të rëndësishëm në operacionet e NATO-s në Lindjen e Mesme.
Ndërkohë, autoritetet turke pranojnë se, pavarësisht përpjekjeve për zhvillimin e sistemeve vendase, vendi ende nuk ka një mburojë të plotë të mbrojtjes ajrore dhe vijon të mbështetet në sistemet e NATO-s në Mesdheun lindor.
Sipas burimeve turke, që nga fillimi i konfliktit janë rrëzuar tre raketa, të cilat Ankaraja pretendon se janë lëshuar nga Irani, duke rritur më tej nevojën për forcimin e mbrojtjes në rajon.
© Panorama.al
