Shefi i Stacionit të Policisë Roskovec, Mariglen Koroveshaj, ka zbuluar detaje nga operacioni për shpëtimin e 24-vjeçares Rozalinda Plaka, e cila u mbajt peng nga ish-partneri i saj, Refit Buzi, pas krimit të rëndë ku mbetën të vrarë prindërit e së resë.
Efektivi i Policisë, i cili negocioi për orë të tëra me 35-vjeçarin, tregon se autori vendosi kushte, duke i kërkuar që të afrohej i vetëm dhe pa armë, ndërsa e paralajmëroi të mos i afrohej më shumë se dy metra.
“Jam afruar në vendin ku ndodhej, por ai refuzonte ta lironte vajzën, pasi e konsideronte si garanci që nuk do t’i ndodhte asgjë. Më kërkoi të afrohesha i vetëm dhe i paarmatosur. E zbatova kërkesën e tij. Kur u afrova, kërkoi sërish të bindej se nuk isha i armatosur. Duhej të bënim gjithçka që ai të mos acarohej më tepër, pasi qëllimi ynë ishte shpëtimi i jetës së pengut dhe i vetë autorit”, rrëfen Koroveshaj.
Sipas tij, pas negociatave u arrit që 35-vjeçari të lironte Rozalinda Plakën, e cila kishte pësuar lëndime në trup nga copat e xhamit të thyer gjatë sulmit me armë në banesën e familjes së saj.
“Kur u afrova, më tha ‘Mos bëj më asnjë lëvizje, mos u afro më shumë se do të vras veten’. U tërhoqa dhe vazhduam negociatat derisa u bë e mundur lirimi i pengut. Ishte një moment shumë i rrezikshëm. Në ato çaste mendon vetëm si të shpëtosh një jetë njeriu. Çdo sekondë ishte vendimtare”, shprehet ai.
Menjëherë pas lirimit, 24-vjeçarja u transportua me urgjencë në Spitalin e Fierit, pasi ndodhej në gjendje të rënduar psikologjike.
Megjithëse vajza u shpëtua, negociatat nuk arritën ta bindnin autorin të vetëdorëzohej. I rrethuar nga forcat e Policisë dhe RENEA-s, Refit Buzi i dha fund jetës duke u vetëqëlluar me armë zjarri.
Ngjarja e rëndë ndodhi disa ditë më parë në fshatin Vidhisht të Roskovecit. Sipas Policisë, 35-vjeçari vrau me armë gjahu ish-vjehrrin e tij, Kosta Plakën, 58 vjeç, plagosi rëndë ish-vjehrrën, Belere Plakën, 55 vjeçe, e cila ndërroi jetë më vonë në spital, dhe më pas mori peng ish-të fejuarën e tij, Rozalinda Plakën.
Lidhur me motivin e ngjarjes, hetimet janë përqendruar në dy pista kryesore, konfliktin pas ndarjes së çiftit dhe pretendimet e autorit për një shumë prej 180 mijë paundësh, të cilat ai kërkonte t’i ktheheshin pas përfundimit të lidhjes.
