Ministri i inteligjencës i Iranit, Esmaeil Khatib është vrarë, sipas ministrit izraelit të mbrojtjes. Khatib u “eliminua” gjatë natës, tha Israel Katz.
Katz tha se kryeministri Benjamin Netanyahu ka autorizuar ushtrinë të vrasë çdo zyrtar tjetër të lartë iranian që është në shënjestër pa pasur nevojë për miratim shtesë.
“Ai ishte përgjegjës për sistemin e vrasjeve dhe shtypjes së brendshme të regjimit në Iran dhe për promovimin e kërcënimeve jashtë vendit. Politika e Izraelit është e qartë dhe kategorike: Askush në Iran nuk ka imunitet dhe të gjithë janë në shënjestër”, u shpreh ministri izraelit.
Vdekja e tij e raportuar vjen pasi Teherani konfirmoi vrasjen e shefit të fuqishëm të sigurisë kombëtare të vendit, Ali Larijani, dhe kreut të forcës paramilitare Basij të IRGC-së.
Khatib ishte ndër zyrtarët për të cilët SHBA-të po kërkonin informacione javën e kaluar, duke ofruar një shpërblim deri në 10 milionë dollarë.
Shpërblimi kishte në shënjestër 10 zyrtarë të lidhur me Trupat e Gardës Revolucionare Islamike (IRGC) të Iranit dhe gjithashtu shefin e sigurisë Ali Larijani, i cili u vra të hënën, dhe udhëheqësin e ri suprem, Mojtaba Khamenei.
Esmaeil Khatib, një klerik dhe politikan iranian, shërbeu si Ministër i Inteligjencës që nga viti 2021, me lidhje të ngushta me retorikën dhe udhëheqjen e qeverisë iraniane. Roli i tij ishte strategjik, pasi ai zyrtarisht mbikëqyrte rrjetin e inteligjencës së brendshme dhe të jashtme të Iranit. Ai madje ishte i lidhur ngushtë me Ali Khamenein si një nga bashkëpunëtorët e tij më të ngushtë, siç thekson Jerusalem Post.
© Panorama.al
