Shqetësimet në lidhje me ndikimin e mediave sociale në shëndetin mendor dhe zhvillimin e fëmijëve po bëjnë që gjithnjë e më shumë vende të vendosin kufizime.
Pas Australisë, e cila ndaloi përdorimin e platformave nga fëmijët nën 16 vjeç në dhjetor, tani Spanja dhe Franca po ndërmarrin hapat e tyre.
Në Spanjë, Kryeministri Pedro Sanchez njoftoi në një fjalim në Samitin Botëror të Qeverive në Dubai se vendi do të ndalojë aksesin në mediat sociale për fëmijët nën 16 vjeç dhe platformat do të jenë të detyruara të zbatojnë sisteme të verifikimit të moshës.
“Mediat sociale janë bërë një ‘sistem i dështuar’ dixhital, ku ligjet injorohen dhe krimet tolerohen ”, tha ai. “Ne do t’i mbrojmë fëmijët nga kjo.” Në të njëjtën kohë, qeveria spanjolle po planifikon një projektligj të ri që do t’i bënte menaxherët e platformave përgjegjës për përmbajtje të paligjshme ose intolerante.
Në Francë, Parlamenti ka miratuar një projektligj që ndalon përdorimin e mediave sociale nga fëmijët nën 15 vjeç, duke e bërë vendin të dytin pas Australisë që merr një masë të tillë.
Legjislacioni, i cili ka mbështetjen e Presidentit Emmanuel Macron, përfshin gjithashtu një ndalim të telefonave celularë në shkollat e mesme, që synon mbrojtjen e të rinjve nga ekspozimi i tepërt ndaj ekraneve dhe efektet negative në shëndetin e tyre mendor.
“Emocionet e fëmijëve dhe adoleshentëve nuk janë për shitje apo manipulim, qoftë nga platformat amerikane apo algoritmet kineze”, tha Macron në një video të transmetuar së fundmi. Autoritetet duan që masat të zbatohen që nga fillimi i vitit shkollor 2026 për llogaritë e reja, ndërsa ato ekzistuese duhet të çaktivizohen deri në fund të vitit.
Legjislacioni parashikon përjashtime për enciklopeditë online dhe platformat arsimore, ndërsa zbatimi i një sistemi të besueshëm të verifikimit të moshës është tashmë në proces në nivel evropian.
Pavarësisht reagimeve nga disa parti dhe organizata politike, të cilat flasin për “paternalizëm dixhital” ose një zgjidhje “tepër të thjeshtëzuar”, shumica beson se ky veprim mund ta ndryshojë rrënjësisht marrëdhënien e adoleshentëve me mediat sociale dhe ta mbrojë brezin e ri nga efektet negative të epokës dixhitale.
© Panorama.al
