Një aksident rrugor është regjistruar këtë të mërkurë (17 qershor) në autostradën Fier-Lushnjë, pranë rrethrrotullimit të Kolonjës.
Sipas informacioneve paraprake, një mjet tip fuoristradë ka goditur nga pas një kamionçinë në hyrje të rrethrrotullimit. Përplasja ka qenë e fortë, duke shkaktuar plagosjen e dy personave që udhëtonin në fuoristradë.
Të lënduarit janë transportuar me ambulancë drejt Spitalit të Lushnjës, ku sipas burimeve spitalore ndodhen nën kujdesin e mjekëve dhe fatmirësisht janë jashtë rrezikut për jetën.
Nga të dhënat e para dyshohet se aksidenti është shkaktuar si pasojë e shpejtësisë së lartë me të cilën po lëvizte mjeti tip fuoristradë.
Policia dhe grupi hetimor po punojnë për të dokumentuar ngjarjen dhe për të zbardhur rrethanat e plota të aksidentit.
© Panorama.al
