Vende evropiane, të udhëhequra nga Franca dhe Italia, kanë nisur bisedime me Teheranin në përpjekje për të negociuar një marrëveshje që do të garantonte kalimin e sigurt të anijeve të tyre përmes Ngushticës së Hormuzit.
Lajmi bëhet i ditur nga burime të cituara nga Financial Times, në lidhje me përpjekjet për të rifilluar dërgesat e energjisë nga rajoni i Gjirit.
Transporti përmes kësaj ngushtice strategjike, hyrja kryesore drejt Gjirit, nga e cila kalon rreth një e pesta e naftës dhe gazit natyror të lëngëzuar në botë, është reduktuar ndjeshëm pas sulmeve iraniane ndaj tankerëve dhe zotimit të liderit të ri suprem të Iranit për ta mbajtur Ngushticën të mbyllur.
Sipas tre zyrtarëve të informuar mbi zhvillimet, kryeqytetet evropiane kanë nisur diskutime fillestare me synimin për të rifilluar eksportet e naftës dhe gazit pa përshkallëzuar konfliktin. Ndërkohë, kompanitë detare po i drejtohen forcave detare perëndimore për mundësinë e shoqërimit të tankerëve të tyre.
Dy nga zyrtarët konfirmuan se Franca është një nga vendet që po merr pjesë në këto bisedime. Njëri prej tyre shtoi se edhe Italia ka bërë përpjekje për të hapur kanale komunikimi me Teheranin mbi këtë çështje.
Megjithatë, dy zyrtarë theksuan se nuk ka asnjë garanci që bisedimet do të avancojnë apo se Irani do të jetë i gatshëm të negociojë. Sipas vlerësimeve të gjera, Teherani po përpiqet të rrisë çmimet e naftës dhe gazit për të ushtruar presion mbi presidentin amerikan Donald Trump që të përfundojë konfliktin.
Ndërkohë, lideri i ri suprem i Iranit, Mojtaba Khamenei, premtoi të enjten se do të vazhdojë të bllokojë Ngushticën.
© Panorama.al
