Bylis mund Flamurtarin duke rihapur kampionatin. Një gol në minutën e fundit të takimit të shënuar nga Fjodor Xhafa i dha trepikëshin skuadrës ballshiote.Bylis është shndërruar në “macen e zezë” të Flamurtarit, duke e mundur dy herë brenda këtij sezoni në kampionat liderin absolut të Kategorisë Superiore. Ashtu siç ishte parashikuar, fusha e Ballshit konfirmohet një makth i vërtetë për Flamurtarin, që nuk ka arritur të fitojë asnjëherë këtë sezon, si në kampionat, ashtu edhe në kupë. Ballshiotët u besuan këmbëve të Fjodor Xhafës, i cili në minutën e 89-të të ndeshjes shënoi golin trepikësh. Goli i tetë sezonal për 34-vjeçarin, i formuar në shkollën vlonjate gëzoi më së shumti edhe korçarët, të cilët ndodhen tashmë -3 pikë më pak se Flamurtari. Deri në momentin e shënimit të golit, të dyja skuadrat kanë luftuar shumë dhe takimi ka qenë i balancuar si në raste, ashtu edhe në volumin e lojës. Por ajo që ka rënë në sy ka qenë loja e ashpër sidomos nga ana e vendasve dhe tolerimi deri në ekstrem nga ana e arbitrave të ndeshjes. Ndoshta do të duhej të nxirrej të paktën dy herë kartoni i kuq për lojtarët e ekipit të Bylisit, por për Kridens Metën e kuqja doli vetëm për trajnerin Gugash Magani, i cili u largua nga pankina në minutën e 52-të të ndeshjes. Pas kësaj ndeshjeje, Flamurtari vazhdon të kryesojë me 52 pikë Kategorinë Superiore pas 24 javësh, por tani ka vetëm 3 më shumë se Skënderbeu i vendit të dytë, që u duk se do t’i lante duart me titullin pas atij barazimi në Kavajë, por ka ndodhur e kundërta. Me këto tri pikë, Bylisi lë vendin e parafundit duke parakaluar Besën dhe duke u ngjitur në vendin e 10-të me 24 pikë.
Superiore/Java 24
Të premten
Shkumbini-Laçi 2-5
Kuli 11′ (p), Gërboviç 67’/ Dragiçeviç 33′, 36′, 53′, Selimi 48′, Hysa 75′
Të shtunën
Besa-Skënderbeu 0-0
Teuta-Vllaznia 0-0
Dinamo-Elbasani 3-1
Ferraj 35′, Bërkiç 38′, Martinena 87’/ Kacollja 89′
Kastrioti-Tirana 2-0
Alvish 62′ Inkango 78′
Dje
Bylis-Flamurtari 1-0
F.Xhafa 90′
Renditja
Nr. Ekipi ND F B H P
1. Flamurtari 24 17 1 6 52
2. Skënderbeu 24 15 4 5 49
3. Vllaznia 24 12 7 5 43
4. Laçi 24 11 4 9 37
5. Dinamo 24 10 6 8 36
6. Tirana 24 8 10 6 34
7. Kastrioti 24 7 8 9 29
8. Shkumbini 24 8 5 11 29
9. Teuta 24 7 7 10 28
10. Bylis 24 7 3 14 24
11. Besa 24 5 8 11 23
12. Elbasani 24 4 3 17 12
Shënim: Elbasani, minus 3 pikë në renditje, i dënuar nga FIFA për shkak të çështjes “Darko Periç”.
LEONARD KARAJ
© Panorama.al
