Vetëm dy ditë larg Kuvendit të demokratëve, thirrur nga ish-Kryeministri, Sali Berisha, përmes foltoreve të zhvilluara nëpër Shqipëri dhe një situate shumë të acaruar mes përkrahësve demokratë të Bashës dhe Berishës, gjendja në Parlament nuk duket edhe aq keq.
Deputetët demokratë janë shfaqur edhe këtë të enjte në seancën e radhës. Paparazzi i “Panorama plus” i ka fotografuar për të kuptuar se deri ku është shtrirë kjo përçarje e madhe që po ndodh në Partinë Demokratike, por fotot, në fakt, na treguan një panoramë krejt tjetër dhe mbi të gjitha, shumë paqësore.
Deputeti demokrat i Ebasanit, Luçiano Boçi, iu bashkua “Foltores” së Berishës rreth një muaj më parë kur ai mbajti tubimin e përkrahësve të tij në Elbasan, fakt ky që bëri jo pak lajm. Ndërkohë, ai shihet duke i mbajtur çadrën Jorida Tabakut, njërës prej njerëzve më të afërt të kryetarit Basha.
Ndërkohë, kryetari i Grupit Parlamentar të PD-së, Alfred Rushaj, i cili është gjithashtu një mbështetës i Bashës, është parë duke folur shumë miqësisht dhe për minuta të tëra me njërin prej mbështetësve më të flaktë të Berishës, Flamur Nokën.
/Panoramaplus.al
