Mbrëmjen e kaluar, performanca madhështore e Jonida Maliqit me këngën “Ktheju tokës”, arriti ta kualifikojë Shqipërinë në natën finale që do të mbahet këtë të shtunë.
E lumtur nga kjo arritje, Jonida ka ndarë me ndjekësit në “Instagram” momentin e kualifikimit dhe ka dhënë për ta mesazhin më të bukur, duke u shprehur se tashmë ndihet fituese.
“Shqiponja prek qiellin, sytë dhe këmbët rikthehen gjithmonë në tokë!! Nuk kam heshtur asnjë moment në këtë rrugëtim, edhe kur dëgjoja në kor fansat europianë që këndonin shqip #Kthejutokës, edhe kur më nisnin nga Tirana lajme nga më të çuditshmet! Unë bëra dje atë për të cilën marr frymë, për të cilën edhe erdha në këtë skenë: Këndova!! Jam emocionuar si kurrë më parë me 3 minutat e mia dhe të Shqipërisë, akoma më shumë kur dëgjova: Albania! Po jetoj ëndrrën time, mbështetja dhe votat tuaja nuk ndalën fluturimin e shqiponjës!! Jemi në finale, por, tashmë, unë mendoj se kemi fituar, jo vetëm me kualifikimin, por edhe me njëri-tjetrin! U bëmë bashkë si kurrë më parë dhe unë për këtë ju jam pafund mirënjohëse!!! Ju dua shumë, shihemi në finale”, shkruan Jonida krahas videos.