Arijon Ibrahimoviç, një nga emrat të cilët FSHF po monitoron prej vitesh dhe pret që t’i bashkohet ngjyrave kuqezi, ka bërë hapin e madh të karrierës, duke u bërë tashmë zyrtarisht pjesë e ekipit të parë të Bajern Mynih.
Lajmin e ka bërë të ditur vetë klubi gjerman, i cili njoftoi se 20-vjeçari do të ishte nën urdhrat e Vincent Kompani pas tre vitesh në huazime të njëpasnjëshme në klube të ndryshme.
NJOFTIMI I BAJERN MYNIH
FC Bajern ka vendosur të integrojë sulmuesin Arijon Ibrahimoviç në ekipin e parë të trajnerit Vincent Kompani për sezonin e ri. 20-vjeçari e kaloi sezonin e kaluar në huazim te FC Hajdenhajm. Ibrahimoviç, i cili ka qenë me FC Bajern që nga viti 2018, është nën kontratë deri më 30 qershor 2028. Ai kishte fituar përvojë te skuadrat e Serisë A, Frozinone dhe Lacio, përpara se të kalonte te Hejdenhajm. Ai do të veshë fanellën me numrin 22.
Drejtori sportiv i FC Bajern, Kristof Frojnd: “Arijon iu bashkua FC Bajern kur ishte dymbëdhjetë vjeç. Ai ka përparuar hap pas hapi përmes akademisë tonë dhe periudhave të synuara të huazimit. Në vitin e fundit te Hajdenhajm në veçanti, ai ka mësuar shumë personalisht për të qenë gati për FC Bajern. Zhvillimi i tij është një shembull i shkëlqyer i mundësive që u ofrojmë talenteve tona. Tani nuk ka më të bëjë vetëm me të mësuarit, ka të bëjë me lënien e gjurmës së tij këtu te FC Bajern”.
Ibrahimoviç iu bashkua të rinjve të FC Bajern nga FC Nyrenberg në moshën 12 vjeç. Ai spikati me performancat e tij për rezervat dhe debutoi me ekipin e parë kundër Bohum në moshën 17 vjeç në shkurt 2023. Ai bëri 34 paraqitje zyrtare për Hajdenhajm në sezonin e kaluar, duke shënuar dy gola dhe duke asistuar për pesë të tjerë. Ai debutoi për ekipin U21 të Gjermanisë në nëntor dhe ka bërë dy paraqitje për të deri më tani.
PANORAMASPORT.AL
© Panorama.al
