Të paktën 22 persona u plagosën kur një tren pasagjerësh doli nga shinat në rajonin e Ulyanovsk, rreth 900 kilometra në lindje të Moskës, thanë autoritetet rajonale në Rusi, duke shtuar se nuk pati viktima.
Shtatë vagonë të trenit që lidh Chelyabinsk në Urale me Moskën dolën nga shinat në aksidentin, i cili ndodhi herët këtë mëngjes, sipas guvernatorit rajonal Alexei Ruskih.
Aksidenti ndodhi pranë stacionit Briandino, rreth 70 kilometra nga qyteti i Ulyanovsk, shpjegoi ai në një postim në aplikacionin Telegram, duke shtuar se shkoi në vendngjarje.
Pamjet e transmetuara nga rrjeti televiziv rus Vesti treguan të paktën dy vagonë treni të shtrirë në anë të shinave mes mjegullës së dendur.
“Sipas informacioneve fillestare, dy pasagjerë pësuan fraktura (…) dhe njëzet të tjerë, përfshirë një fëmijë, pësuan mavijosje”, shkroi guvernatori i rajonit Chelyabinsk, Alexei Teksler, në një postim në Telegram. “Nuk ka viktima”, theksoi ai.
Një raport i mëparshëm thoshte se shtatë persona u plagosën.
Komiteti Hetues Rus, i cili është përgjegjës për rastet e mëdha hetimore në vend, tha se ka nisur një hetim për shkelje të rregulloreve të sigurisë dhe operimit hekurudhor, duke shtuar se hetuesit e tij kishin shkuar në vendin e aksidentit.
Treni mbante 412 pasagjerë, sipas një zyrtari të Hekurudhave Ruse (RZD), i cituar nga agjencia ruse e lajmeve RIA Novosti.
© Panorama.al🇷🇺 7 cars of a passenger train traveling from Moscow to Chelyabinsk Derailed in Ulyanovsk Region. No casualties pic.twitter.com/4UopMtBXqX
— World In Last 24hrs (@world24x7hr) April 3, 2026
