Lëvizja Bashkë ka protestuar mëngjesin e kësaj të premteje para bashkisë së Durrësit për përmbytjet masive që kanë prekur disa zona të qytetit prej disa ditësh.
Ata kërkojnë shpalljen e gjendjes së jashtëzakonshme si edhe hetim të thelluar për hidrovorin e dytë. Po ashtu ata kërkojnë edhe investigim për vdekjen e punonjësit të bashkisë Astrit Hysenaj, që u gjet u pajetë dje pasi dyshohet se u mor nga rrjedha e ujit.
Lëvizja kërkon mes të tjerash që organet e drejtësisë të hetojnë edhe portin e ri që po ndërtohet, akuza për të cilin ka shprehur më herët edhe PD.
“Gjendje e jashtëzakonshme tani”, “Uji na mbyt, korrupsioni sundon”, “Hetim për portin e ri”, ishin disa nga pankartat që mbanin në duar protestuesit.
Kujtojmë që një ditë më parë, prokuroria e Durrësit nisi hetimet për përmbytjet për tre vepra penale shpërdorim detyre, shkatërrimi i pronës me përmbytje dhe shkatërrimi i pronës nga pakujdesia.
Organi i akuzës ka dyshime se situata të jetë shkaktuar për shkak të mosfunksionimit të hidrovorit që ka kushtuar 19 milionë euro.
