Presidenti i Shteteve të Bashkuara, Donald Trump, ka njoftuar përmes një postimi në platformën Truth Social se do të udhëtojë drejt Francës për të marrë pjesë në samitin e liderëve të G7.
Samiti është planifikuar të zhvillohet në periudhën 15–17 qershor në Évian-les-Bains.
Trump deklaroi se do të niset për në Paris menjëherë pas një eventi të arteve marciale të përziera (MMA) që do të zhvillohet në Shtëpinë e Bardhë në ditën e lindjes së tij, më 14 qershor, një ngjarje të cilës ai i kushtoi më shumë vëmendje në postimin e tij sesa samitit të G7.
“Do të marr pjesë në samitin e G7 në Francë, menjëherë pas një prej netëve më argëtuese në historinë amerikane: ndeshjet e Kampionatit Botëror të Ultimate Fighting Championship në Kopshtin Jugor të Shtëpisë së Bardhë.
Dokumentet tregojnë se, ndonëse gjatë historisë së gjatë dhe të pasur të Shtëpisë së Bardhë janë zhvilluar evente sportive me nivel më të ulët, kurrë më parë nuk ishte menduar të organizohej në ‘Shtëpinë e Popullit’ diçka që i afrohet kësaj: luftëtarët më të mëdhenj në botë, të gjithë kampionë!”, shkruan ai në postimin e tij.
Më herët, ministri i Jashtëm Marco Rubio njoftoi se presidenti amerikan do të marrë pjesë gjithashtu në samitin e NATO-s, i cili do të zhvillohet në Ankara më 7 dhe 8 korrik.
© Panorama.al
