Presidentja moldave ka thënë se do të votonte në favor të ribashkimit me Rumaninë nëse çështja do të vihej në një referendum, duke shpjeguar se po bëhet gjithnjë e më e vështirë për vendin e saj të mbijetojë i vetëm.
“Shikoni çfarë po ndodh rreth Moldavisë sot. Shikoni çfarë po ndodh në botë”, shpjegoi Sandu, e cila udhëheq një qeveri pro-evropiane, në podkastin britanik The Rest is Politics.
“Po bëhet gjithnjë e më e vështirë për një vend të vogël si Moldavia të mbijetojë si demokraci, si vend sovran dhe, sigurisht, t’i rezistojë Rusisë ”, tha ajo.
Megjithatë, Sandu pranoi se ideja e ribashkimit me Rumaninë nuk mbështetet nga shumica në vendin e saj, ndryshe nga anëtarësimi në BE, për të cilin vendi aplikoi në vitin 2022 dhe të cilin ajo e përshkroi si “më realiste”.
Dy të tretat janë kundër ribashkimit me Rumaninë, tregojnë sondazhet e fundit. Në Rumani, nga ana tjetër, përqindje më të larta janë në favor të bashkimit të dy vendeve.
Me një popullsi prej rreth 2.4 milionë banorësh, Moldavia, e vendosur midis Rumanisë dhe Ukrainës, është bërë një objektiv i luftës hibride të Rusisë, e cila përfshin dezinformimin dhe manipulimin e zgjedhjeve, siç raporton Politico.
Në një referendum të vitit 2024, moldavët votuan me një shumicë të ngushtë (50.4%) në favor të anëtarësimit në BE, në një garë të dëmtuar nga ndërhyrja ruse.
Sandu u rizgjodh presidente në një votim paralel me rreth 55% të votave, duke mposhtur kundërshtaren e saj pro-ruse.
© Panorama.al
