Martesa 12-ditore e Pamela Anderson me Jon Peter ishte e destinuar që të dështonte që në fillim sepse ‘zemra e saj ishte shumë e hapur’ kur pranoi propozimin e tij të befasishëm të martesë.
Ish ylli i Baywatch surprizoi fansat duke u martuar me producentin 74-vjeçar të filmave në janar vetëm për tu ndarë 12 ditë më vonë.
Por miqtë e Pamelës pretendojnë se 52-vjeçarja ishte në gjendje të ndjeshme emocionale para se të pranonte propozimin e tij, pasi kohët e fundit u kthye nga një pastrim shpirtëror prej një muajsh në Indi.
“Pamela nuk funksionon në të njëjtën gjatësi vale si njerëzit e tjerë. Ajo ka një zemër të madhe dhe i dashuron shumë dhe shpejt. Kur u kthye nga udhëtimi Jon i tha: ‘Unë të dua, le të martohemi’. Dhe ajo i tha: ‘Në rregull’,”- tha një burim për Page Six.
Pamela kishte kaluar më pak se tre ditë me Peter, me të cilin ka qenë e lidhur edhe 30 vite më parë, përpara se të binte dakord të martohej me të.
Por u deshën vetëm dy ditë që aktorja të kuptonte se kishte bërë një gabim të tmerrshëm duke u martuar me ish të dashurin e saj, i cili thuhet se është autoritar dhe i fiksuar pas famës.
“Pamela mendonte se ai ishte i irrituar nga mënyra sesi ajo dëshironte të ruante pavarësinë e saj financiare,”- pohoi burimi. “Ai kërkoi që ta fuste në një film ku po punonte, por ajo nuk e dëshironte këtë gjë.”
Ylli kanadez konfirmoi ndarjen nga Peter në një deklaratë në mediat sociale duke u thënë fansave se ata po merrnin kohë për të rivlerësuar çfarë donin nga jeta dhe nga njëri-tjetri.
Kjo ishte martesa e pestë si për aktoren ashtu edhe për producentin.
