Elita Rudi ka udhëtuar drejt Turqisë për të kaluar disa ditë pushimi e me këtë rast ka zgjedhur të shkojë për një darkë në restorantin luksoz të kuzhinierit turk, Nusret Gokçe.
Këtë e tregoi vetë moderatorja me anë të disa videove të publikuara në Instastory-n e saj. Në to shihet një hamburger në tavolinë, i cili është i mbështjellë me një letër ngjyrë ari. Meqënëse restoranti është i njohur për çmimet e “kripura”, Elita nuk i ka shpëtuar pyetjes për faturën.
“Për juve që po më pyesni për hamburgerin e Nusretit, është veç një hamburger i mbështjellë me letër ngjyrë ari. Më të mirë i kemi hamburgerat e Prishtinës, që kushtojnë nga një euro sesa këtu. Plus ai ma prishi hamburgerin me atë thikë, a e patë?!”,- tha Rudi.
Më pas, ajo pyeti fansat nëse duan vërtet që ta publikojë faturën, për të treguar publikisht se sa ka kushtuar hamburgeri i famshëm. Pas shumë kërkesave, Elita zbuloi se zgjedhja që kishte bërë, i ka kushtuar 65.02 euro. Ndërsa e gjithë darka në total, i ka kushtuar 293.73 euro.
Muajin e kaluar, Nusreti u kritikua për çmimet marramendëse në restorantin e tij të ri që e ka hapur në Londër, pasi një faturë u bë virale në rrjet.
I njohur si “Salt Bae”, Nusret hapi restorantin e tij të 15-të në Kinghtsbridge. Sipas “The Sun”, vetëm një biftek i shërbyer në restorantin e tij kushton plot 630 paund.
Përdoruesi i “Twitter”, Jamil Amin, ndau një fotografi të faturës me shkrimin: “44 paund për 4 Red Bull”. Postimi që grumbulloi mijëra pëlqime, u pasua nga komentet e njerëzve që u shprehën të tronditur nga çmimet marramendëse në menu.
Një klient tjetër ka paguar më shumë se 1,812 paund vetëm për një darkë në restorantin luksoz. Artikulli i vetëm pa kosto në menu është çaji turk, i cili shërbehet falas. Fatura tregon se shërbimi për tetë klientë gjithashtu kushton plot 236.40 paund.
Restoranti i Nusret nuk i tregon çmimet në internet. Sipas burimeve, pavarësisht çmimeve, restoranti është i rezervuar për disa muaj dhe aktualisht nuk ka asnjë vend të lirë.
