“Festivali i 58-të i Këngës në RTSH” ishte padyshim një nga më të bujshmit i cili u shoqërua me polemika të shumta. Ndër më kryesoret ishte prishja e raporteve të moderatores Alketa Vejsiu me Arilena Arën dhe menaxherin e saj Popi Kola.
Ato kanë patur një raport shumë të ngushtë, të nisur vite më parë kur Arilena, ende fëmijë mori pjesë te ‘Gjeniu i vogël’ ku Alketa ishte prezantuese. Lidhja mes tyre u forcua edhe më shumë gjatë edicionit të dytë të ‘X-Factor’ ku ishin sërish në të njëjtat role konkurrente dhe prezantuese. Mirëpo, hera e tretë që u bënë bashkë nuk përfundoi mirë. Arilena arriti të triumfonte për të na përfaqësuar në ‘Eurovision’ duke i lënë vendin e dytë Elvana Gjatës. Gjë që shkaktoi shumë bujë dhe kontestime, me publikun që u nda në dy kampe: ata që mbështesnin Arilenën dhe ata që mbështesnin Elvanën. E kampit të dytë duket se i përkiste edhe Alketa.
Moderatorja i kërkoi një ndjesë publike Elvanës, duke u shprehur se votimi i jurisë nuk ishte në dorën e saj dhe ajo s’mundi t’i jepte dot zë zërit të publikut. Kjo gjë duket se nuk i pëlqeu Arilenës, e cila nuk vonoi shumë dhe e hoqi moderatoren nga Instagram-i. Më pas të njëjtën gjë bëri edhe Alketa. Në një intervistë në ‘Opinion’ në shkurt të 2020 prezantuesja u shpreh krenare për fitoren e Arilenës, për të cilën u shpreh se është një vajzë super e talentuar. “Jam shumë krenare që Arilena e ka fituar dhe e ka mbajtur prestigjin e atij çmimi. Nuk ka dyshim që është një vajzë super e talentuar. Kam patur vetëm një rezervë që në fillim kur Arilena u bë pjesë e kastit sepse Shqipëria vuan nga nepotizmi dhe gjithmonë prioritizohen njerëzit që janë afër nesh ata zënë vend pune, ata marrin çmime, por kam qenë kundra zgjedhjes së pjesë tjetër të stafit që ajo të ishte pjesë e festivalit vetëm për këtë shkak se mos u presë ëndrrat të tjerëve. Është 21 vjeç mund të vinte në festivalin tjetër ta fitonte por jo në kurriz të kësaj kauze”.
Po ashtu, filluan të qarkullonin zëra lart e poshtë se aleanca mes Grabockës dhe Vejsiut ishte prishur. Mirëpo, me kalimin e kohës dhe zbehjes së polemika që la pas çmimi i madh i këtij festivali palët janë ulur sërish në bisedime. Mes të tjerash, ‘Dosja.al’ raportonte asokohe se Alketa për t’u rikthyer pranë stafit të Grabockës ka kërkuar që menaxheri Popi Kola të mos ishte më asistenti i regjizores. Kërkesë kjo që është plotësuar nga Grabocka, pasi Kola nuk është më asistenti i saj dhe Vejsiu ka nisur programin e radhës me regjisoren Grabocka, atë “Në kurthin e Piter Pan”.
Megjithatë, këto mbetën në kuadrin e thashethemeve pasi nuk u konfirmuan asnjëherë. Me siguri dihet se marrëdhënia e tyre u prish, por tani është përmirësuar. Ka qenë Alketa ajo e cila ka publikuar në rrjetet sociale një foto krah Popit, duke shkruar: “Skuadra më fantastike. Ribashkim!” Popi do jetë pjesë e skuadrës së saj në ‘Dance with me’ që do rifillojë edicionin tjetër këtë shtator.
Pak javë më parë pas dy vitesh, Alketa vendosi të thyejë akullin, duke publikuar në Instagram një video të shkëputur nga vitit 2013 kur Arilena ishte pjesë e “X Factor”. Në momentin e shkëputur Arilena vrapon e emocionuar drejt Alketës dhe e përqafon. “Ky përqafim vlen sa 1000 fjalë. Më fal Arilena Ara. Të dua. Bashkë në kërkim të gjërave të bukura”, -ka shkruar Alketa teksa ka zgjedhur që të bllokojë komentet në këtë postim. Ndërsa nga këngëtarja ende nuk ka asnjë reagim.
© Panoramaplus.al
View this post on Instagram
