Ndarja nga jeta aktorit të njohur shqiptar, Mirush Kabashi është pritur me hidhërim nga kolegë dhe të afërm, të cilët janë shprehur të tronditur nga vdekja e “Mjeshtrit të Madh”.
Një ndër personazhet që ka reaguar është edhe këngëtari Luiz Ejlli, përmes një postimi në llogarinë e tij në Instagram.
“Lamtumirë Mirush Kabashi”, ka shkruar artisti krahas fotos me aktorin.
Aktori ka ndërruar jetë në orët e para të mëngjesit të së martës (5 dhjetor), ndërsa lajmin e trishtë të Mirush Kabashit, e ka njoftuar familja e tij në një njoftim në Instagramin e tij zyrtar
“Të nderuar Miq, Kolegë dhe Dashamirës, me pikëllim të thellë ju njoftojmë se MIRUSH KABASHI ndërroj jetë të Martën, në datë 5 Dhjetor pas mesënate. Përsa i përket detajeve të ditës, orës së varrimit dhe homazheve do ju komunikojmë në orët në vazhdim.
Me Respekt, Familja Kabashi!”- shkruhej në faqen e tij zyrtare.
Mirush Kabashi lindi më 17 prill 1948 në Shkodër dhe është rritur në Durrës. Është një aktor shqiptar. Origjina e tij është nga Gjakova. Ai është aktor i rreth 100 roleve, në teatër dhe filma. Shpesh ka qenë edhe prezantues i aktiviteteve të shumta artistike. Gjithashtu, Kabashi është cilësuar si një nga interpretuesit më të mëdhenj të poezisë në Shqipëri.
Ai ka dhënë një kontribut të madh në filmografinë shqiptare. E ndërsa një pjesë të jetës së tij ia ka kushtuar edhe teatrit me rolet e tij të larmishme, ku ndër to më i veçanti ka mbetur ai i Sokratit tek “Apollogjia e fundit e Sokratit”.
© Panoramaplus.al