Disa nga vajzat në shtëpinë e “Big Brother VIP” janë ankuar vazhdimisht për djemtë që janë brenda, sepse asnjë prej tyre nuk është beqar. Prandaj, nisur nga kjo, ato i kërkuan vëllait të madh që t’i sjellë disa djem të rinj, që nuk kanë lidhje dashurie jashtë.
Pas kësaj deklarate, Arbana Osmani nisi të pyeste një nga një mbrëmë djemtë e shtëpisë për të zbuluar se cili prej tyre është i martuar ose në një lidhje. Kur erdhi radha e aktorit të humorit, Donald Veshajt, përgjigja ishte “No comment!”, pra “s’kam asnjë koment“. Megjithatë, ai vazhdoi të sqaronte deklaratën e tij dhe tha:
“Nuk kam koment! Nuk e thash për pjesën siç të tjerët mund ta kenë marrë, si i lirë. Nuk dua ta diskutoj më atë marrëdhënie, atë situatë se ndoshta përdoret dhe për keq. Është një gjë që më përket mua dhe asaj (Borës). Unë i shpreha shumë mirë ndjenjat e mia, gjërat që doja të bëja, i bëra. Dhe unë personalisht nuk dua ta komentoj më atë gjë, sepse jam këtu për tjetër gjë”.
Pak javë më parë, këngëtari i shprehu dashurinë që ende ndjen moderatores Bora Zemani, pas 5 muajsh të ndarë. Veshaj i ka bërë një premtim asaj, që do të hyjë dhe do të dalë vetëm nga shtëpia.
