Angela Martini dhe bashkëkorti ti saj rumun, Dragos Savulescu, prej më shumë se dy muajsh tashmë janë bërë prindër për herë të parë. Teksa po përshtatet me jetën e saj të re, modelja ka lajmëruar se është në kërkim të një dadoje e cila duhet të plotësojë një kusht.
Në një postim në Instastory ajo shkruan se po kërkon një dado për djalin e saj, por me sa duket kushti kryesor është që ajo të jetë shqiptare. Pavarësisht se modelja është e martuar me një rumun ajo ka shprehur se dëshiron që djali i saj Kyree të flasë edhe gjuhën shqipe.
“Jam në kërkim të një dadoje shqiptare në Milano. E dua shqiptare, sepse dua edhe im bir të flasë edhe shqip gjithashtu,”, shkroi ajo në foton e postuar.
Djali i tyre, Kyree erdhi në jetë në 2 dhjetor 2021 nga një nënë zëvendësuese në Dallas të SHBA.
“Ndihem e përmbushur dhe kam nevojë të jap shumë dashuri”, tha Angela Martini për “Blick”. “Ndjeva lidhjen e fortë me djalin që në momentin kur erdhi në jetë, është e vështirë ta shpjegosh me fjalë.”
Ndër të tjera ajo tregoi edhe se si ka ndryshuar rutina e saj pas lindjes së Kyree dhe si e menaxhon kohën.
“Ka të bëjë me gjetjen e mënyrës së duhur për të kombinuar prindërimin me aktivitetet e tjera, si puna, që ju nevojiten në jetë. Mendoj se kam gjetur ekuilibrin”.
