Shumë aludime ka patur këto vite rreth raportit të Dua Lipës dhe Rita Orës të cilat pavarësisht famës dhe suksesit ndërkombëtar asnjëherë nuk janë bërë bashkë, ndryshe nga sa kanë vepruar me Bebe Rexhës, krah të cilës të dyja janë shfaqur disa herë.
Asnjëra prej tyre nuk ka treguar se çfarë ka ndodhur konkretisht, por dukshëm marrëdhënia mes dy artistëve nuk është e ngrohtë. Gjithsesi, fansat e tyre shqiptarë presin me padurim t’i shohin bashkë.
Dashur-padashur dy artistet do bëhen me bashkë mbrëmjen e sotme në Brazil, pasi të dyja janë ftuar të performojnë në festivalin “Rock In Rio 2022”. ‘Rock in Rio’ është një nga festivalet më të mëdha të muzikës në botë që nisi në Brazil dhe më vonë u degëzua në vende të tjera si Lisbona, Madridi dhe Las Vegas. Këtë vit dy organizime janë konfirmuar tashmë. Lisbona priti edicionin e 9-të në datat 18, 19, 25 dhe 26 qershor në Bela Vista Park. Rio de Zhaneiro priti edicionin e tij në datat 2, 3, 4 dhe 8, 9, 10, 11 shtator me këngëtarë si Justin Bieber, Coldplay, Demi Lovato, Jessie J etj.
Deri tani nuk ka ende detaje rreth performancave të dy yjeve me origjinë shqiptare, por shpresojmë që më në fund t’i shohim krah njëra-tjetrës. Dua Lipa ka disa ditë që ndodhet në Brazil, ku edhe rinisi turin e saj “Future Nostalgia”. Për herë të fundit, ajo u shfaq e qeshur me disa truprojave teksa shkonte për në një helikopter që do e çonte në festivalin vjetor të qytetit.
Çfarë tha Rita Ora pak ditë më parë për Dua Lipën?
Gjatë konferencës për shtyp para koncertit në Tiranë më 6 shtator, Rita Ora foli për herë të parë në lidhje me mundësinë e një bashkëpunimi mes saj dhe Dua Lipës. Konkretisht këngëtarja u pyet nëse do të ketë në të ardhmen një bashkëpunim mes saj dhe artisteve të tjera që kanë korrur sukses ndërkombëtar, Dua Lipa, Bebe Rexha dhe Ava Max.
Në përgjigjen e saj Rita Ora e buzëqeshur përmendi fillimisht hapat e parë të karrierës së sa, e cila nisi rreth një dekadë më parë. Këngëtarja tha se ndihet shumë me fat dhe e lumtur që vendi jonë po njihet më shumë falë artistëve shqiptarë. Sa i përket bashkëpunimit, Rita tha se “gjërat bëhen në kohën” e duhur, duke shtuar se kur të vijë kjo kohë ajo është “gati.”
“E kuptova këtë. Kur unë fillova në 2011 në 2012 u ndjeva se kisha shumë më shumë presion për ta futur vendin tim në hartën globale dhe mendova që jam e vetmja në atë kohë. Tani jam e çliruar që kam shumë më shumë nga vendi im në fushën time por edhe në fushat e tjera. Ne kemi shumë talent si ato që përmende, dhe do të ishte një ëndërr për mua që një ditë që të bëhemi të gjitha bashkë, në kohën e duhur. Të gjitha ka axhendën e ngjeshur, po në kohën e duhur, por mua mund të më llogarisni (po)”- tha Rita Ora.
Çfarë ka ndodhur mes Rita Orës dhe Dua Lipës?
Ndonëse vijnë nga i njëjti vendi, fansat nuk i kanë parë ndonjëherë bashkë përgjatë këtyre viteve, për shkak të një hatërmbetjeje që ekziston mes tyre. Sipas asaj që raportohet, shkak është bërë mungesa e mbështetjes nga Rita për Duan kur kjo e fundit ishte në fillim të karrierës dhe tashmë që ka kapur majat autorja e hitit “New Rules” nuk ia fal këtë gjë.
Bebe Rexha kohë më parë shprehu dëshirën për një bashkëpunim mes artisteve shqiptare me famë botërore, Dua Lipa, Rita Ora dhe Ava Max. Ndonëse dëshira nga shqiptarët ishte e madhe, kjo gjë nuk ndodhi dhe shkak u bë armiqësia që vazhdon prej pak vitesh mes Duas dhe Ritës. Bebe ka treguar se ka dëshiruar prej kohësh që të realizohet ky bashkëpunim, por planet janë shkatërruar për shkak të dy artisteve të tjera.
“Kam tentuar vërtetë. Nuk e di realisht se çfarë po ndodh mes tyre apo çfarë historie ka. Gjithmonë kam tentuar të ruajë paqen dhe t’i bashkoj vajzat. Për mua, do të doja shumë që të bënim diçka bashkë, por nuk jam e sigurt se do të ndodhë ndonjëherë. Dhe nuk do të them më gjë për këtë.
Është e çuditshme, sepse unë e di se çdo të thotë të jesh vajzë dhe ndonjëherë ne mund të bëhemi shumë konkurruese. Nuk po flas vetëm për veten, Duan, Ritën apo Avan, por flas për gjithë femrat në përgjithësi. Nuk ka shumë vajza në industri. Është e trishtueshme që ka një konkurrencë të pashprehur. Do të doja shumë që të ndodhte, sepse unë i njoh të gjitha këto vajza personalisht dhe janë të gjitha të mrekullueshme”, është shprehur Bebe për “The Sun”.
Katër vite më parë u raportua në media se Rita Ora dhe Dua Lipa nuk kishin raporte të mira me njëra-tjetrën, kjo për shkak se Rita Ora nuk mori pjesë në Sunny Hill Festival. Dua sqaroi për herë të parë asokohe marrëdhënien që ka me këngëtaret e tjera me origjinë shqiptare si Rita Ora apo edhe Bebe Rexha për t’iu dhënë fund spekulimeve. Në atë kohë Dua tha se arsyeja e mos prezencës së Ritës në koncert është ajo.
Siç u shpreh edhe babai i saj, i cili është organizator i këtij koncerti, Rita dhe Bebe do të ishin prezente në festivalin që do organizohet vitin tjetër, por nuk u organizua si pasojë e pandemisë. Festivali që u mbajt këtë vit në Prishtinë dhe Tiranë, nuk pa në skenë e tij asnjë nga këngëtaret shqiptare me famë botërore.
“Kemi dashur të sjellim shumë artiste femra në festivalin ‘Sunny Hill’, përfshirë këtu Rita Orën, Bebe Rexhën, Era Istrefin dhe të tjerë…”, tha Dua në 2018.
