Lideri i Hungarisë, Viktor Orbán, mori vlerësime nga Sekretari amerikan i Shtetit, Marco Rubio, gjatë vizitës së këtij të fundit në Budapest të hënën, në prag të zgjedhjeve në Hungari që do të mbahen në prill.
Kryeministri nacionalist përballet me një sfidë të rëndësishme nga opozita.
“Mund t’ju them me siguri se Presidenti Donald Trump është thellësisht i përkushtuar ndaj suksesit tuaj, sepse suksesi juaj është edhe suksesi ynë”, deklaroi Rubio gjatë një konference të përbashkët për shtyp me Orbán, pas takimit mes tyre.
Sekretari amerikan i Shtetit, Marco Rubio, mbërriti në Budapest pasditen e së dielës. Politikani 54-vjeçar është zyrtari më i lartë amerikan që viziton kryeqytetin hungarez që nga vizita e ish-Sekretarit të Shtetit, Mike Pompeo, i cili kishte vizituar Hungarinë dhe pesë vende të tjera në kuadër të një turi evropian rreth shtatë vite më parë, në vitin 2019.
Vizita e Rubios në Evropë është më e shkurtër krahasuar me atë të paraardhësit të tij, duke përfshirë vetëm Bratislava dhe Budapestin në axhendë, pas pjesëmarrjes në Munich Security Conference.
Të dyja këto ndalesa lidhen me synimin e SHBA-së për të thelluar bashkëpunimin energjetik me Sllovakinë dhe Hungarinë, ndërsa kryeministrat e të dy vendeve, Robert Fico dhe Viktor Orbán, konsiderohen aleatë të Presidentit Donald Trump.
© Panorama.al
