Në kulmin e protestave që prej javësh po zhvillohen në Tiranë, ku mijëra qytetarë kërkojnë dorëheqjen e kryeministrit Edi Rama, kreu i qeverisë ka zgjedhur t’u përgjigjet duke i ironizuar përmes vargjeve të poetit Dritëro Agolli.
Në një postim në rrjetet sociale, Rama publikoi poezinë “Kundërshtarëve të mi”, ku ndër të tjera thuhet:
“Ju aq baltë po hidhni mbi mua,
Sa në baltën që kam përmbi trup,
Mund të mbijë një dardhë a një ftua…”
Poezia përcjell idenë se sulmet dhe kritikat kthehen në forcë dhe mundësi.
Por postimi i kryeministrit ka marrë një përgjigje nga gazetari Klevin Muka, i cili ka zgjedhur gjithashtu t’i referohet Dritëro Agollit.
Muka publikoi poezinë “Një i çmendur, një vend e çmend”, ku vargjet përmbyllëse thonë:
“Në vendin tim e në vendin tënd,
Një i çmendur, një vend e çmend.”
