Zëvendëspresidenti i SHBA-së, J.D. Vance tha se beson që Izraeli do t’i bashkohet marrëveshjes së re midis Shteteve të Bashkuara dhe Iranit në një fazë të mëvonshme, duke shtuar se marrëveshja do të rriste sigurinë si të Izraelit ashtu edhe të të gjithë rajonit.
“Ajo që dimë është se kjo marrëveshje do ta bëjë Izraelin më të sigurt dhe do të rrisë stabilitetin në të gjithë Lindjen e Mesme”, tha Vance në një intervistë me NBC News.
Zëvendëspresidenti amerikan pretendoi se rreth marrëveshjes po qarkullojnë “dezinformata”, si nga mediat iraniane ashtu edhe nga ato izraelite, ndërsa shprehu besimin se opinioni publik izraelit do të ndryshojë qëndrimin e tij kur detajet e saj të bëhen të njohura.
“Ne besojmë fuqimisht se kur populli izraelit ta kuptojë përmbajtjen e marrëveshjes, do ta shohë atë si një mundësi për një Lindje të Mesme të re, me më shumë paqe dhe prosperitet në rajon”, tha ai.
“Kjo është e gjitha që mund të kërkojmë. Jemi mjaft të bindur se Izraeli në fund të fundit do ta mbështesë këtë proces ndërsa zhvillimet ecin përpara”, shtoi ai.
Deklaratat e Vance vijnë disa orë pas konferencës për shtyp të kryeministrit izraelit Benjamin Netanyahu, i cili theksoi se vendi i tij nuk është palë në memorandumin e mirëkuptimit midis Uashingtonit dhe Teheranit dhe se ende nuk ka një pamje të plotë të kushteve të marrëveshjes.
© Panorama.al
