Hunter Biden ka ushtruar kritikë publike ndaj qeverisjes së babait të tij, ish-presidentit Joe Biden, në një intervistë të gjatë të dhënë për podcastin “The Shawn Ryan Show”, duke pranuar se politika e emigracionit dhe mënyra e tërheqjes nga Afganistani ishin “dështime katastrofike”.
Duke iu referuar çështjes së emigracionit, 55-vjeçari Hunter Biden deklaroi se “na duhet emigracion i gjallë dhe funksional”, por theksoi se “nuk duam emigrantë që hyjnë ilegalisht, duke shteruar burimet tona dhe duke marrë përparësi ndaj njerëzve që janë realë, fjalë për fjalë heronj, dhe që ende po rikuperohen nga 20 apo 21 vite lufte të pandërprerë ose ndaj kujtdo tjetër në shoqërinë tonë”.
Gjatë presidencës Biden, vlerësohet se rreth 2.4 milionë emigrantë hynin çdo vit në Shtetet e Bashkuara, sipas të dhënave të Zyrës së Buxhetit të Kongresit, ndërsa një analizë e Goldman Sachs arriti në përfundimin se 60% e tyre kalonin kufirin ilegalisht.
Në një pjesë tjetër të intervistës, Hunter Biden tha se Shtëpia e Bardhë kishte siguruar një marrëveshje me republikanët për mbështetjen e një projektligji të gjerë për sigurinë kufitare, i negociuar nga senatorët James Lankford, Kyrsten Sinema dhe Chris Murphy.
Sipas tij, “gjashtë muaj para zgjedhjeve të vitit 2024, Donald Trump ndërhyri dhe u tha republikanëve se do të kthehej kundër kujtdo që votonte pro projektligjit, sepse ne jemi të varur nga problemi”.
Ndërkohë që Shtëpia e Bardhë këmbëngulte se nevojiteshin ndërhyrje ligjore për sigurinë e kufijve, Trump, sipas Hunter Biden, ishte mbështetur gjatë mandateve të tij në urdhra ekzekutivë për të luftuar emigracionin e paligjshëm.
Ai u shfaq veçanërisht kritik edhe për tërheqjen nga Afganistani, duke e quajtur atë “një dështim të qartë, të tmerrshëm”. “Mendoj se kishte një mënyrë më të mirë për t’u bërë. Mund t’ua hedh fajin gjeneralëve apo të tjerëve për mënyrën se si u realizua, por dhe babai im e ka ditur gjithmonë këtë, përgjegjësia përfundimtare ishte e tij”, tha ai.
Tërheqja e nxituar u shënua nga sulmi vetëvrasës i ISIS-K në aeroportin Hamid Karzai të Kabulit, ku u vranë 13 ushtarakë amerikanë që po merrnin pjesë në operacionin e evakuimit të afganëve që po iknin nga talebanët.
Hunter Biden sqaroi se “tërheqja nga Afganistani ishte vendimi i duhur”, por njëkohësisht u pajtua me moderatorin Shawn Ryan, i cili tha se “nuk e duron mënyrën se si u krye”.
“E kuptoj zemërimin tënd për këtë”, iu përgjigj ai, duke shtuar se babai i tij mendonte se “20 vjet ishin të mjaftueshme dhe se nuk ishte në interesin e askujt në Shtetet e Bashkuara që të qëndronin më gjatë atje”.
© Panorama.al
