VOLEJBOLL MESHKUJ/ “Play off”, Partizani e Tirana projektojnë betejën për titullin
Partizani dhe Tirana e kanë nisur më këm bë të mbarë “play off”-in në Superligën e volejbollit për meshkuj. Ekipet kryeqytetase kanë shkëlqyer në ndeshjet e para gjysmëfinale, duke marrë fitore bindëse.
Të kuqtë triumfuan në shtëpi kundër Vllaznisë me rezultat të pastër, ndërsa kampionët në fuqi kalon me sukses një pengesë aspak të lehtë si Erzeni, duke i mundur shijakasit në transfertë me rezultatin 1-3. Tashmë Partizani dhe Tirana janë vetëm një fitore larg kalimit për në finale dhe nëse diçka e tillë do të konkretizohej, atëherë do të kishim një “deja vu” të edicionit të kaluar.
PARTIZANI-VLLAZNIA – Të kuqtë e Ylli Tomorrit e nisin “play off”-in siç përfunduan sezonin e rregullt, duke vijuar kështu ecurinë e shkëlqyer me të gjitha ndeshjet e fituara në sezonin 2023-2024. Partizanin i mjaftuan 1 orë e 17 minuta për t’i mbyllur llogaritë me rezultatin e pastër 3- 0 në gjysmëfinalen e parë kundër Vllaznisë në pallatin e sportit “Asllan Rusi”. Seti i parë nisi me rivalitet, teksa fillimisht Vllaznia arriti t’i përgjigjej mjaft mirë lojës së kryeqytetasve, deri në pikët 15-15. Por më tej organizimi dhe kualiteti më i lartë i “demave” bëri diferencën në parket, me Partizanin që e fitoi setin e parë 25-20. Në setin e dytë vendësit krijuan epërsi që në fillim, për ta kontrolluar më pas qetësisht lojën, duke e fituar setin sërish në shifrat 25-20, ndërsa pika finale kishte për protagonist brazilianin Soares Souza.
Në setin e tretë kuqeblutë e Artan Kalasë kërkuan reagimin, ndërsa ia dolën duke kryesuar deri në 18-19. Por më pas Partizani “zgjohet” për ta fituar edhe setin e tretë me rezultatin 25- 20, teksa protagonisti i “match point”-it ishte Muharrem Deliu. Për sa i përket fazës sulmuese edhe një herë tjetër spikati Raul Sabliqi, me talentin e të kuqeve që shënoi 15 pikë, mbështetur nga Soares Souza me 13. Për Vllazninë shënuesi më i mirë ishte kanadezi Andrew Dube me 12 pikë. Më 15 prill, në pallatin e sportit “Qazim Dervishi” në Shkodër do të jetë radha për gjysmëfinalen e dytë, me Partizanin që tashmë është vetëm një fitore larg kualifikimit për në finale. Ndërsa kuqeblutë do të tentojnë mrekullinë në fushën e tyre, duke ëndërruar për ta çuar serinë me 3 ndeshje.
ERZENI-TIRANA – Pasi kaluan lehtësisht fazën para “play off” kundër Skënderbeut, bardheblutë e Arben Sakos kanë hedhur një hap shumë të rëndësishëm drejt finaleve për të tretin sezon radhazi, duke fituar gjysmëfinalen e parë kundër Erzenit. Tirana triumfoi mbrëmjen e djeshme me rezultatin 1-3 në pallatin e sportit “Dhimitraq Goga”, në një përballje që zgjati 1 orë e 48 minuta. Kryeqytetasit u futën të vendosur në parket, duke kryesuar thuajse gjatë gjithë kohës në setin e parë, për të fituar 21-25. Seti i dytë ishte edhe më interesant, me përmbysje dhe ripërmbysje, për përsëri ishin miqtë që bënë më mirë, duke e marrë setin 22-25 për ta çuar epërsinë në 0-2.
Skuadra e Ilia Kojës u rifut në lojë, duke fituar setin e tretë 25-22 për të ngushtuar në 1-2. Por miqtë i mbyllën llogaritë, duke dominuar setin e katërt, të cilin e fituan thellë 17-25, për të vulosur suksesin final 1-3, teksa “match pont”-i u firmos nga kapiteni Ledion Martiro. Njeriu i ndeshjes ishte Izuchukwu Oforah, me nigerianin që realizoi 23 pikë për Tiranën. Në radhët e shijakasve spikatën Asmend Kula dhe Amadou Samb me nga 18 pikë secili. Më 15 prill në Farkë do të jetë radha e gjysmëfinales së dytë, takim që sheh si pritëse skuadrën e Tiranës.
ARTIN LLESHAJ-PANORAMASPORT.AL
NDIQE LIVE "PANORAMA TV"